Ulttyq qaýipsizdik komıtetine jańa ókilettikter berildi
ASTANA. KAZINFORM — Qasym-Jomart Toqaevtyń 2026 jylǵy 9 aqpandaǵy Jarlyǵymen Qazaqstan Respýblıkasy Ulttyq qaýipsizdik komıteti týraly erejege ózgerister men tolyqtyrýlar engizildi.
Qazaqstan Respýblıkasy Ulttyq qaýipsizdik komıteti — Qazaqstan Respýblıkasy Prezıdentine tikeleı baǵynatyn jáne esep beretin, óz ókilettikteri sheginde ulttyq qaýipsizdik organdarynyń biryńǵaı júıesine, barlaý, qarsy barlaý jáne jedel-izdestirý qyzmetine, Memlekettik shekarany qorǵaý jáne kúzetý salasyna, úkimettik baılanysty qamtamasyz etý men shıfrlaý jumysyn uıymdastyrýǵa, sondaı-aq aqparattandyrý salasyndaǵy memlekettik baqylaýǵa (aqparattyq-kommýnıkatsııalyq ınfraqurylymnyń asa mańyzdy obektileriniń aqparattyq qaýipsizdigi bóliginde), terrorızm aktileriniń jáne jeke adamǵa, qoǵam men memleketke qarsy ózge de asa qaýipti qylmystyq qol suǵýshylyqtardyń jolyn kesýge basshylyqty júzege asyratyn arnaýly memlekettik organ.
Sonymen qatar, UQK ulttyq qaýipsizdik organdary avıatsııasynyń qyzmetin uıymdastyrady, sybaılas jemqorlyq quqyq buzýshylyqtardy anyqtaıdy, jolyn kesedi, ashady jáne tergeıdi, memlekettik qupııalardyń qorǵalýyn qamtamasyz etedi ári Qazaqstan Respýblıkasynda olardy qorǵaý jónindegi ýákiletti organ sanalady.
Endi Komıtet aqparattyq qaýipsizdikti qamtamasyz etý jáne jedel-izdestirý is-sharalaryn júrgizýge arnalǵan arnaıy tehnıkalyq quraldar salalarynda berilgen ruqsattar boıynsha memlekettik baqylaýdy júzege asyrýǵa quqyly. Atalǵan baqylaý berilgen ruqsattar sheńberinde biliktilik nemese ruqsat berý talaptaryna sáıkestigin tekserý túrindegi tekserýler jáne Qazaqstan Respýblıkasynyń Kásipkerlik kodeksine sáıkes júrgiziletin jospardan tys tekserýler nysanynda júzege asyrylady.
Qazaqstan Respýblıkasy Ulttyq qaýipsizdik komıtetiniń jańa fýnktsııalaryna mynalar jatady:
— aqparattyq-kommýnıkatsııalyq ınfraqurylymnyń asa mańyzdy obektileriniń aqparattyq qaýipsizdigi bóliginde aqparattandyrý salasynda memlekettik baqylaýdy júzege asyrý;
— aqparattyq-kommýnıkatsııalyq ınfraqurylymnyń asa mańyzdy obektileriniń aqparattyq qaýipsizdigi bóliginde aqparattandyrý salasyndaǵy Qazaqstan Respýblıkasy zańnamasynyń talaptary buzylǵan jaǵdaıda nusqamalar berý;
— aqparattyq-kommýnıkatsııalyq ınfraqurylymnyń asa mańyzdy obektileriniń aqparattyq qaýipsizdigi bóliginde aqparattandyrý salasyndaǵy Qazaqstan Respýblıkasy zańnamasynyń talaptary buzylǵany anyqtalǵan kezde oryndalýy mindetti nusqamalardy joldaý.
Jarlyq 2026 jylǵy 9 aqpannan bastap qoldanysqa engizildi.
Buǵan deıin UQK qazaqstandyqtardyń jeke derekterin qorǵaıtyn jańa qurylym jasaqtaýy múmkin ekenin jazǵanbyz.