Ulttyq qaýipsizdik komıteti jalǵan aqparat týraly eskertti

ASTANA. KAZINFORM — QR Ulttyq qaýipsizdik komıteti jalǵan aqparat taraǵanyn habarlady.

— Áleýmettik jelilerde patrıottyqqa qarsy rıtorıkany taratatyn, «Bessmertnyı polk» aktsııasyna boıkot jarııalaýǵa shaqyratyn nemese qoǵamdy jikke bólýge baǵyttalǵan ózge de áreketterdi jasaıtyn tulǵalar týraly aqparat jınaý úshin Telegram boty qurylǵany týraly «Qazaqstan Respýblıkasy Ulttyq qaýipsizdik komıteti baspasóz qyzmetiniń resmı málimdemesi» degen aqparat tarap jatyr, — delingen habarlamada.

UQK atalǵan «málimdeme» — jalǵan, ondaǵy málimetter shyndyqqa janaspaıtynyn eskertti.

UQK-niń resmı aqparattary tek «knb.gov.kz» saıty, «knbgov_kz» Telegram-arnasy jáne «knbgovkz» Instagram-paraqshasy arqyly jarııalanady.

— Tek resmı derekkózderge senip, jalǵan aqparat taratpaýǵa shaqyramyz, — dep habarlady quzyrly organnyń baspasóz qyzmeti.

Eske sala keteıik, buǵan deıin UQK Astana jáne 3 oblysta terrorızmdi nasıhattaǵan 4 azamat ustady.