Jaramsyz bolyp qalǵan úsh AN-26 ushaǵy satylymǵa shyǵaryldy
ASTANA. KAZINFORM — «Qazarnaýlyeksport» kásiporny úsh jaramsyz (synǵan) AN-26 ushaǵyn aýktsıon arqyly satýǵa shyǵardy.
Aýktsıon 11 maýsym kúni saǵat 11:00–de ótedi jáne ol baǵany kóterý qaǵıdaty boıynsha uıymdastyrylady. Ár lottyń bastapqy baǵasy — 11 mıllıon teńge. Barlyq áýe kemesi Almaty oblysyndaǵy Boraldaı kentinde ornalasqan.
Baǵalaý qorytyndysyna sáıkes, ushaqtar qazir paıdalanylmaıdy jáne kúrdeli jóndeýdi qajet etedi. Áýe kemeleri jaramsyz kúıde dep tanylyp, metall (ýtıl) retinde baǵalanǵan.
Sondaı-aq ushaqtardy satyp alýshy paıdalanylmaıtyn múlikti alý-satý sharty boıynsha lottyń satý baǵasynyń 15%-y mólsherinde satýshyǵa komıssııalyq syıaqy tóleýge mindetti. Bul tólem alý-satý shartyna qol qoıylǵan kúnnen bastap 10 jumys kúninen keshiktirilmeı júrgizilýi tıis.
Odan bólek satyp alýshy taýardy balans ustaýshynyń aýmaǵynan óz kúshimen jáne jeke qarajaty esebinen satýshydan ruqsat alý týraly habarlama jiberilgen kúnnen bastap 30 jumys kúninen keshiktirmeı áketýge mindetti.
Aıta ketsek, jyl basynan Ulttyq qaýipsizdik komıteti polıtsııa jáne prokýratýra organdarymen birlesip 12 avtomat, 41 tapansha, 75 myltyq, 36 granata jáne ártúrli kalıbrdegi 1 603 oq-dári tárkiledi.
Eske salaıyq, birer kún buryn Prezıdent ulttyq qaýipsizdik organdary qyzmetiniń baǵyttary boıynsha UQK tóraǵasyna birqatar tapsyrma berdi.