Ulttyq qaýipsizdik komıtet Oral qalalyq sot tóraǵasynyń paramen ustalǵanyn rastady
ASTANA. KAZINFORM — Ulttyq qaýipsizdik komıteti Oralda qalalyq sot tóraǵasy Rýslan Jumaǵulov para alý kezinde ustalǵanyn rastady.
«Qazaqstan Respýblıkasy Qylmystyq kodekstiń 366 (para alý) jáne 367 (para berý) babynda kózdelgen quqyqbuzýshylyq belgileri boıynsha sotqa deıingi tergep-tekserý júrip jatyr», — delingen agenttik joldaǵan resmı saýal jaýabynda.
Sondaı-aq, UQK atalǵan iske qatysty ózge de aqparattyń Qylmystyq-protsestik kodekstiń 201 babynyń 1 bóligine sáıkes qupııa ekendigin habarlap otyr.
Eske sala ketsek, 5 qarasha kúni Oralda qalalyq sot tóraǵasy Rýslan Jumaǵulov para alý kezinde ustaldy. Bul aqparatty Kazinform agenttigine óz aqparat kózderi rastaǵan edi.
Sot tóraǵasymen birge eki advokat Ádil Ahmýldın men Nurjigit Fazylǵalıev te qolǵa túsken.
1,5 mln teńge kólemindegi para sottalǵan azamatqa qatysty oń sheshim qabyldaý úshin baǵyttalǵan.
BQO prokýratýrasynyń baspasóz qyzmeti aqparatty ókiletti organ — UQK departamenti beretinin jetkizdi.
Rýslan Jumaǵulov 2019 jyldan beri qalalyq sot tóraǵasy bolyp jumys istegen.
