Ulttyq qaýipsizdik: Qazaqstanda qos azamattyqqa qatysty jaza kúsheıtilmek

ASTANA. KAZINFORM – Іshki ister mınıstrligi elimizde qos azamattyqqa qatysty derekterge jazany kúsheıtý usynysyn talqalaýǵa daıyn. Bul týraly vedomstvo basshysy Erjan Sadenov málim etti.

Búgin Májilistiń jalpy otyrysynda depýtat Bolatbek Najmetdınuly elimizdiń Konstıtýtsııasynda qos azamattyqqa tyıym salynǵanyn aıta kele, alaıda elimizdegi keıbir adamdar basqa eldiń azamattyǵyn alǵanyn jasyryp júrgenin eske saldy. Osy oraıda olar Qazaqstan azamatynyń quqyǵy men barlyq jeńildikterdi emin-erkin paıdalanyp júr. 

- Qos azamattyǵy bar adamdar anyqtalǵan jaǵdaıda da jaýapkershilik tek aıyppulmen ǵana shektelip jatady... Men depýtat retinde mundaı derekter boıynsha qylmystyq jaýapkershilikke tartýǵa qatysty bastama kótermekpin. Bul turǵyda Іshki ister mınıstrligi qoldaı ma? - dep surady depýtat.

Óz kezeginde Erjan Sadenov bul usynysty talqylaýǵa daıyn ekenin aıtty.

- Parlament zań qabyldasa, biz jumys isteýge daıynbyz. Sebebi, zań - birinshi qarýymyz. Durys aıtasyz, qos azamattyqty paıdalanyp, túrli krımınal da bolýy múmkin. Sondyqtan bul bastamany talqylaýǵa daıynbyz. Bul rette, ulttyq qaýipsizdik máselesi de bar, - dedi mınıstr.

Budan buryn habarlanǵandaı, Pavlodar oblysynda qos azamattyqqa qatysty myńnan astam derek anyqtaldy.

Zań boıynsha ózge memlekettiń azamattyǵy qabyldanǵan jaǵdaıda adamǵa belgilengen merzimde (30 kún) kóshi-qon qyzmeti organdaryn habardar etý jáne Qazaqstan Respýblıkasynyń azamattyǵynan aıyrylýyn tirkeý qajet.