Ulttyq ınvestıtsııalyq platforma iske qosylady — Memleket basshysy

ASTANA. KAZINFORM — Bıyl Ulttyq tsıfrlyq ınvestıtsııalyq platforma iske qosylady. Bul týraly QR Prezıdenti janyndaǵy Sheteldik ınvestorlar keńesiniń 36-shy plenarlyq otyrysynda Memleket basshysy Qasym-Jomart Toqaev aıtty.

«Úkimet ınvestorlardyń quqyqtaryn qorǵaý úshin sot jáne quqyqtyq júıeni jetildirýdi jalǵastyryp jatyr. Prokýrorlyq baqylaý tetigi zańsyz aralasýǵa, ákimshilik aıyppuldarǵa jáne tólemderdi toqtata turýǵa qarsy aldyn alý sharasy retinde jumys isteıdi. Sonymen qatar Úkimet pen ınvestorlar arasyndaǵy tsıfrlyq ózara is-qımyl da keńeıe túsýde. Osy jyldyń sońyna qaraı naqty ýaqyt rejıminde jobalardyń iske asyrylý barysyn baqylaý úshin ulttyq tsıfrlyq ınvestıtsııalyq platforma paıdalanýǵa beriledi. Budan basqa, basym jobalar úshin ruqsat berýdi, jer ýchaskelerin bólýdi jáne ınjenerlik ınfraqurylymmen qamtamasyz etýdi jeńildetetin „jasyl dáliz“ qurylatyn bolady», — dedi Qasym-Jomart Toqaev.

Osy oraıda Prezıdent Ekonomıkany yryqtandyrý týraly Jaryq shyqqanyn eske salyp ótti.

«Alǵashqy sharalardyń biri jańa kvazımemlekettik qurylymdardy qurýdy shekteý jáne ulttyq jekeshelendirý bıýrosyn qurý boldy. Sonymen qatar, jańa Salyq kodeksi ınvestıtsııalyq tsıkldiń qaıta bastalýyn tezdetýge kómektesedi. Negizgi jańalyqtardyń biri — ınvestıtsııalyq salyq preferentsııalaryn engizý, mysaly, mashınalardy, jabdyqtardy jáne baǵdarlamalyq jasaqtamany satyp alýǵa baılanysty barlyq shyǵyndar úshin salyq shegerimin berý», — dedi Memleket basshysy.

Buǵan deıin Qazaqstan tehnıkalyq jáne kásiptik bilim berý sapasyn arttyrýǵa daıyn ınvestorlardy izdeıtindigin jazǵan edik.

Sondaı-aq 2029 jylǵa qaraı elimiz 150 mlrd dollar tikeleı shetel ınvestıtsııasyn tartady.