Ulttyq gospıtalde jańa medıtsınalyq korpýstar salynady
ASTANA. KAZINFORM – QR PІB Medıtsınalyq ortalyǵynyń Ulttyq gospıtali aýmaǵynda jańa medıtsınalyq korpýstardy kezeń-kezeńimen salýdy kózdeıtin aýqymdy jańǵyrtý jumystary bastaldy.
Joba aıasynda ınfraqurylymnyń bir bóligi jańartylyp, zamanaýı kópsalaly medıtsınalyq keshen qurylady.
Tehnıkalyq tekserýlerdiń qorytyndysy boıynsha 1950-1970 jyldary salynǵan keıbir ǵımarattardyń tehnıkalyq jaı-kúıi edáýir nasharlaǵany jáne qaýipsizdik, seısmoturaqtylyq pen emdeý protsesin uıymdastyrýdyń qazirgi talaptaryna sáıkes kelmeıtini anyqtaldy. Zertteý barysynda qurylys konstrýktsııalarynda jaryqtar men ınjenerlik jelilerdiń aıtarlyqtaı tozý belgileri tabyldy. Sonymen qatar tehnıkalyq jaǵdaıdy qosymsha baǵalaý nátıjesinde 2024 jylǵy jer silkinisteriniń áserinen keıbir korpýstardyń zaqymdanǵany tirkeldi.
Osyǵan baılanysty qoldanystaǵy ǵımarattardyń ornyna jańa medıtsınalyq korpýstardy kezeń-kezeńimen salýdy jáne ınfraqurylymdy keshendi jańartýdy kózdeıtin jańǵyrtý jobasyn iske asyrý týraly sheshim qabyldandy.
Bul sharalar patsıentter men medıtsına qyzmetkerleri úshin qolaıly jaǵdaı jasaýǵa, joǵary tehnologııalyq medıtsınalyq kómektiń múmkindikterin keńeıtýge jáne otandyq densaýlyq saqtaý júıesin halyqaralyq zamanaýı standarttarǵa saı damytýǵa múmkindik beredi.
Sonymen qatar barlyq is-shara aýrýhana jumysyn toqtatpaı-aq júrgiziledi. Beıindi bólimshelerdi basqa medıtsınalyq uıymdarǵa kóshirý josparlanbaǵan. Ujym tolyq quramda saqtalady, al paıdalanýǵa jaramdy medıtsınalyq jabdyqtar medıtsınalyq kómek kórsetý barysynda ári qaraı qoldanylatyn bolady.
Ulttyq gospıtaldyń jańa nysandaryn salý kezeń-kezeńimen júzege asyrylady. Qurylystyń bastalýy 2026 jyldyń birinshi jartyjyldyǵyna josparlanǵan. Jobanyń birinshi kezeńi 2028 jyly aıaqtalsa, tolyq iske asyrylýy 2029 jylǵa belgilengen.
Joba aıaqtalǵannan keıin gospıtal jańartylǵan operatsııalyq bólimderi, zamanaýı jabdyqtary, jaıly palatalary jáne qazirgi talaptarǵa saı ınjenerlik ınfraqurylymy bar medıtsınalyq ortalyqqa aınalady. Sondaı-aq medıtsınalyq protsesterdi basqarýdyń tsıfrlyq júıeleri, ıntellektýaldy navıgatsııa, medıtsınalyq logıstıka salasyndaǵy zamanaýı sheshimder engizilip, patsıentterge, kelýshilerge jáne medıtsına qyzmetkerlerine yńǵaıly, qaýipsiz ári fýnktsıonaldy orta qalyptastyrylady.
– Búginde medıtsınalyq ınfraqurylym tek jaılylyq talaptaryna ǵana emes, qaýipsizdik máselelerine de saı bolýy tıis. Biz kún saıyn kóptegen patsıent pen medıtsına qyzmetkerlerin qabyldaıtyn ǵımarattar týraly aıtyp otyrmyz. Sondyqtan gospıtaldi jańǵyrtý – medıtsınalyq kómekti odan ári damytý jáne emdeýdiń zamanaýı standarttaryn engizý úshin qajetti qadam, - deıdi QR PІB Medıtsınalyq ortalyǵy Ulttyq gospıtaliniń dırektory Ashat Bralov.
Buǵan deıin deıin habarlaǵanymyzdaı, Ulttyq gospıtalde aı saıyn 40-tan astam endoprotezdeý otasy jasalady.
