Ulttyq gospıtalde aı saıyn 40-tan astam endoprotezdeý otasy jasalady
ASTANA. KAZINFORM — 20 mamyr — Dúnıejúzilik travmatolog kúni. Osy kúnge oraı Ulttyq gospıtal mamandary býyn aýrýlarynyń aldyn alý jáne der kezinde medıtsınalyq kómekke júginýdiń mańyzdylyǵyn eske saldy.
Mekemeniń baspasóz qyzmeti habarlaǵandaı, sońǵy jyldary zamanaýı travmatologııa tirek-qımyl júıesi aýrýlaryn dıagnostıkalaý men emdeý múmkindikterin edáýir keńeıtti.
Búginde dárigerler býyndardy endoprotezdeý boıynsha joǵary tehnologııalyq otalardy sátti júrgizip, naýqastardyń ómir sapasy men qımyl belsendiligin qalpyna keltirip jatyr.
Ulttyq gospıtalde emdeýdiń zamanaýı tásilderi men hırýrgııalyq tehnologııalar belsendi túrde engizilip jatyr. Travmatologııa bólimshesiniń sońǵy jetistikteriniń biri nekroz kezinde jambas býyndaryn emdeýge arnalǵan SVF-terapııasynyń ózindik ádistemesiniń ázirlenýi.
Travmatologııa bólimshesi gospıtaldegi eń suranysqa ıe baǵyttardyń biri bolyp qala beredi. Mamandar aı saıyn 40-tan astam ota jasaıdy. Onyń basym bóligin tize býyndaryn endoprotezdeý otalary quraıdy. Aldaǵy jaz mezgilinen bastap otalardyń bir bóligin robottandyrylǵan tehnologııalardyń kómegimen júrgizý josparlanǵan.
Mamandardyń aıtýynsha, búginde býyn aýrýlary tek egde jastaǵy adamdarda ǵana emes, eńbekke qabiletti azamattar arasynda da jıi anyqtalady. Buǵan qozǵalystyń azdyǵy, shamadan tys fızıkalyq júkteme, artyq salmaq jáne tirek-qımyl júıesiniń jaǵdaıyn turaqty baqylamaý sebep bolyp otyr. Dárigerler ýaqytyly dıagnostıka kóptegen aýrýdy erte kezeńde anyqtaýǵa jáne emniń tıimdiligin arttyrýǵa múmkindik beretinin atap ótti.
Travmatologııa bólimshesiniń dárigeri Ashat Qabdeshovtiń aıtýynsha, býyn aýrýlarynyń negizgi sebepteriniń biri fızıkalyq júktemeniń birkelki bolmaýy jáne aldyn alý sharalaryna jetkilikti kóńil bólinbeýi.
— Tize býyndary shamadan tys ári teńgerimsiz júktemege óte sezimtal keledi. Qozǵalys az ómir salty, kenetten bolatyn belsendi fızıkalyq júkteme, qarqyndy jattyǵýlar jáne daıyndyqsyz uzaq kúsh túsý býyndardyń jaǵdaıyna keri áser etýi múmkin, — dedi maman.
Dáriger aýyrsyný, jaısyzdyq nemese qozǵalystyń shektelýi baıqalǵan jaǵdaıda ýaqyt joǵaltpaı mamandarǵa qaralý qajettigin jáne óz betinshe emdelmeý kerektigin aıtty.
Ashat Qabdeshovtiń sózinshe, aldaǵy jyldary travmatologııa salasy qarqyndy damı beredi. Bolashaqtaǵy negizgi baǵyttardyń qatarynda protezdeý tehnologııalaryn jetildirý, 3D tehnologııalary arqyly daıyndalatyn jeke ımplanttardy qoldaný jáne robottandyrylǵan hırýrgııany odan ári damytý bar.
Osydan buryn QR PІB Medıtsınalyq ortalyǵynyń ulttyq gospıtali JCI akkredıtteýinen ótkenin jazǵanbyz.
