Ulttyq ǵylymı-praktıkalyq ortalyǵynyń dırektory taǵaıyndaldy
ASTANA. KAZINFORM — Jádiger Qojahmet Arnaıy jáne ınklıýzıvti bilim berýdi damytý boıynsha ulttyq ǵylymı-praktıkalyq ortalyǵynyń dırektory bolyp taǵaıyndaldy, dep habarlaıdy Oqý-aǵartý mınıstrliginiń baspasóz qyzmeti.
— Oqý-aǵartý mınıstriniń buıryǵymen Qojahmet Jádiger Álisheruly Arnaıy jáne ınklıýzıvti bilim berýdi damytý boıynsha ulttyq ǵylymı-praktıkalyq ortalyǵynyń dırektory qyzmetine taǵaıyndaldy, — delingen habarlamada.
Eńbek jolyn 2014 jyly ádilet organdarynda bastap, 2020 jylǵa deıin sarapshy jáne bólim basshysy laýazymdarynda qyzmet atqarǵan.
2020–2022 jyldary QR Bilim jáne ǵylym mınıstrligi Ǵylym komıtetinde bas sarapshy jáne Quqyqtyq qamtamasyz etý basqarmasynyń basshysy boldy.
2022 jyly Joǵary aýdıtorlyq palatada bas konsýltant qyzmetin atqardy.
2023–2024 jyldary QR Prezıdenti janyndaǵy Ulttyq ǵylym akademııasynda Ákimshilik-quqyqtyq máseleler departamentiniń dırektory qyzmetin atqardy.
2024 jyldyń jeltoqsan aıynan bastap QR Oqý-aǵartý mınıstrligi Inklıýzıvti jáne arnaıy bilim berý departamenti dırektorynyń orynbasary qyzmetin atqaryp keldi.
Merıtokratııa qaǵıdaty negizinde Jádiger Qojahmet QR Oqý-aǵartý mınıstrliginiń «Arnaıy jáne ınklıýzıvti bilim berýdi damytýdyń ulttyq ǵylymı-praktıkalyq ortalyǵy» RMM dırektory qyzmetine taǵaıyndaldy.
Jańa qyzmetinde Jádiger Qojahmet elimizdegi arnaıy jáne ınklıýzıvti bilim berý júıesin odan ári jetildirýge, erekshe bilim berý qajettiligi bar balalarǵa qoljetimdi ári sapaly bilim berý ortasyn qalyptastyrýǵa jaýapty bolady.
Sonymen qatar, Jádiger Qojahmet erekshe bilim berý qajettiligi bar bala tárbıelep otyrǵan áke retinde atalǵan salanyń mańyzyn tereń túsinedi jáne ınklıýzıvti bilim berýdi damytý máselesine jeke tájirıbesi men kásibı jaýapkershiligin ushtastyrady.
Osyǵan deıin Jol aktıvteri sapasynyń ulttyq ortalyǵynyń bas dırektory taǵaıyndalǵanyn jazdyq.
