Ulttyq ǵylym akademııasyna tórt sheteldik ǵalym múshe boldy
ASTANA.KAZINFORM — Ulttyq ǵylym akademııasy álemniń jetekshi ǵalymdaryn sheteldik múshe etip saılady. Bul týraly Ǵylym jáne joǵary bilim mınıstrligi habarlady.
Qazaqstan Respýblıkasy Prezıdentiniń janyndaǵy Ulttyq ǵylym akademııasy (budan ári – Akademııa) álemdik ǵylymı qaýymdastyqpen yntymaqtastyqty nyǵaıtý jolynda mańyzdy qadam jasady.
Akademııanyń 2026 jylǵy 18 tamyzdaǵy №5 Jalpy jınalysynyń sheshimimen Akademııanyń sheteldik músheleri saılandy. Bul sheshim otandyq ǵylymdy jahandyq ǵylymı keńistikke ıntegratsııalaýǵa, halyqaralyq ǵylymı áriptestikti damytýǵa jáne ozyq bilim men tájirıbe almasýǵa jańa múmkindikter ashady.
Akademııanyń sheteldik músheleri bolyp álemdik deńgeıdegi tómendegi jetekshi ǵalymdar saılandy:
MÝZAFFER ShEKER (Muzaffer Şeker, Túrkııa) – Túrkııa ǵylym akademııasynyń (TÜBA) prezıdenti, PhD, professor. Qan tamyrlary, súıek tinderi, neıroanatomııa jáne uryq anatomııasynyń morfometrııalyq zertteýleri salasyndaǵy jetekshi ǵalym.
NAJAT MOHTAR (Najat Mokhtar, Marokko) – MAGATE Bas dırektorynyń orynbasary, PhD. Endokrınologııa, metabolızmdik buzylystar, klınıkalyq nýtrıtsıologııa, sondaı-aq medıtsınada ıadrolyq jáne ızotoptyq tehnologııalardy qoldaný salasyndaǵy jetekshi ǵalym.
KAI-FU LEE (李開復, Qytaı) – Qazaqstan Respýblıkasy Prezıdentiniń shtattan tys keńesshisi, Ph.D. Jasandy ıntellekt, tiltanymy jáne kompıýterlik lıngvıstıka boıynsha jetekshi maman.
GRIFFITS SAIMON (Griffiths Simon, Ulybrıtanııa) – Bıdaı genetıkasy jáne aldyn ala selektsııa tobynyń jetekshisi (JIC), Ph.D. Genetıka, selektsııa salasyndaǵy jetekshi ǵalym, Ulybrıtanııadaǵy genetıkalyq, genomdyq jáne selektsııalyq zertteýlerdiń jetekshisi ári úılestirýshisi.
Atalǵan sheshim Qazaqstan ǵylymynyń halyqaralyq deńgeıdegi bedelin arttyrýǵa jáne álemdik ǵylymı elıtamen tyǵyz baılanys ornatýǵa baǵyttalǵan. Sheteldik múshelerdiń qatysýy birlesken ǵylymı zertteýlerdi damytýǵa, ınnovatsııalyq jobalardy iske asyrýǵa jáne ǵylymı kadrlardy daıarlaý sapasyn arttyrýǵa yqpal etedi.
Qazaqstan Respýblıkasynyń Ulttyq ǵylym akademııasy aldaǵy ýaqytta da halyqaralyq ǵylymı yntymaqtastyqty keńeıtý jáne eldiń ǵylymı áleýetin damytý baǵytyndaǵy jumystardy júıeli túrde jalǵastyrady.
Aıta ketelik «Bolashaq» stıpendııasy men ǵylymı taǵylymdama ıegerleriniń esimi belgili bolǵan edi.
