Ulttyq ǵylym akademııasy jumysynyń jańa prıntsıpin ornatý kerek - Asqar Jumadildaev

ASTANA. KAZINFORM – Ulttyq ǵylym akademııasynyń vıtse-prezıdenti Asqar Jumadildaev elimizdegi ǵylym salasyn damytýǵa qatysty usynysyn aıtty.  

— Men Qasym-Jomart Kemelulynyń eki erligin aıtqym keledi. Birinshiden, 2022 jyly úlken syn keldi. Qazaq memleketiniń shańyraǵy shaıqaldy, biraq qulaǵan joq. Almaty órtke orandy… Toqaev sertinen taımady. Týdy qulatpady, berik ustady. Bul — Qasym-Jomart Kemelulynyń birinshi erligi. Ekinshiden, Ulttyq ǵylym akademııasy 1946 jyly qurylǵan, ıaǵnı Keńes odaǵynyń qıyn kezeńinde irgesi qalandy. Akademııanyń tuńǵysh prezıdenti Qanysh Imantaıuly Sátbaev orasan jumys atqarǵan. Sol kezde ashylǵan ken oryndary búgingi qazaq qazynasyna 90 paıyzyn berip tur. Atalǵan kezeńde salynǵan elektr stasnsalary áli kúnge deıin jumys istep tur. Bul óz kezeginde ǵylym men bilimniń ne ekenin adamzatqa kórsetip otyr… Osy turǵydan alyp qarasaq, Qasym-Jomar Kemeluly qulaǵan akademııany qaıta turǵyzdy. Akademııa kezinde «memleket ishindegi memleket» bolǵan, - dedi A. Jumadildaev Parlament Májilisinde Prezıdent Qasym-Jomart Toqaevtyń saıası reformalaryn iske asyrý taqyrybyn talqylaý kezinde. 

Onyń aıtýynsha, endi ǵylym akademııasynyń burynǵy áleýetin qalpyna keltirý kerek.

— Alǵa ilgerileý qajet. Akademııa jumysynyń jańa prıntsıpin ornatýymyz kerek. Ol úshin qarjylandyrý men ǵylymı ınstıtýttar qurý máselesin tolyqqandy sheshý mańyzdy, - dedi akademık. 

Eske salsaq, byltyr tamyz aıynda QR Prezıdenti janyndaǵy Ulttyq ǵylym akademııasynyń quramyna jańadan 9 ǵalym endi. 

Budan buryn habarlanǵandaı, búgin Parlament Májilisiniń jalpy otyrysynda palata tóraǵasy Erlan Qoshanov «Prezıdent Qasym-Jomart Toqaevtyń saıası reformalaryn iske asyrý — memlekettik qurylystyń jańa tarıhı kezeńi» atty baıandama jasady.