Ulttyq ǵylym akademııasy jas zertteýshiler forýmyn ótkizdi
ASTANA. KAZINFORM — Bıylǵy «Jasandy ıntellekt dáýiri: ІІ Jas zertteýshiler forýmy Ulttyq ǵylym akademııasynyń 80 jyldyq mereıtoıymen, Akademııanyń qurylǵan kúni — 1 maýsymmen jáne Halyqaralyq balalardy qorǵaý kúnimen tuspa-tus keldi.
Bul forým ǵylymǵa, zertteý men ınnovatsııalyq qyzmetke qyzyǵýshylyq tanytqan mektep oqýshylaryn biriktiretin biregeı alańǵa aınaldy. Іs-sharaǵa QR Oqý-aǵartý vıtse-mınıstri Sergeı Kompanıets, QR Ulttyq ǵylym akademııasynyń prezıdenti, akademık Aqylbek Kúrishbaev, Akademııanyń eks-prezıdentteri, qurmetti akademıkter, QR Ulttyq ǵylym akademııasynyń akademıkteri, elimizdiń jetekshi ǵalymdary, jas zertteýshiler men bilim salasynyń mamandary qatysty.
Forýmnyń basty maqsaty — elimizdiń 13 óńirinen, sonyń ishinde Almaty, Astana jáne Shymkent qalalarynan kelgen 385 daryndy oqýshynyń ǵylymı izdenisterin qoldaý, jasandy ıntellekt jáne zamanaýı tehnologııalar baǵytyndaǵy jobalaryn tanystyrý, oqýshylar arasynda ǵylymı oılaý mádenıetin qalyptastyrý jáne jas urpaqtyń ǵylymǵa qyzyǵýshylyǵyn arttyrý boldy.
Akademııa prezıdenti A. Kúrishbaev óz sózinde Memleket basshysy Qasym-Jomart Toqaevtyń 2026 jyldy jasandy ıntellekt pen tsıfrlandyrý jyly dep jarııalaýy ǵylym salasyna jańa mindetter júkteıtinin atap ótti.
— Qazirgi tańda akademııa otandyq ǵylym salasyn reformalaý boıynsha júıeli jumystar júrgizip keledi. Bul jumystyń negizgi basymdyqtarynyń biri — jastardy ǵylymǵa tartý, ǵylymı kadrlardy daıarlaý jáne olardyń kásibı biliktiligin arttyrý. Akademııa janynan Jas ǵalymdar keńesi men Jas zertteýshiler akademııasynyń qurylýy da osy baǵyttaǵy mańyzdy qadamdardyń biri boldy. Búgingi oqýshylardyń ǵylymı ázirlemeleriniń kórmesi jas urpaqtyń ǵylymǵa qyzyǵýshylyǵynyń joǵary ekenin taǵy bir márte dáleldedi, — dedi Aqylbek Kúrishbaev.
Forýmda oqýshylar ózderiniń ǵylymı jáne ınnovatsııalyq jobalaryn tanystyrdy. Jas zertteýshiler jasandy ıntellekt, tsıfrlyq bilim berý platformalary, mashınalyq oqytý, robototehnıka, bıomedıtsına, energetıka, ekologııalyq tehnologııalar jáne basqa da ózekti baǵyttar boıynsha ázirlegen jobalaryn usyndy.
Atap aıtqanda, forýmda «Qanysh Sátbaev murasy jáne jas urpaq», balalarǵa arnalǵan neırojúıe konstrýktory, jasandy ıntellekt negizinde asteroıdtyq qaterlerdi erte anyqtaý júıesi, júrek-qantamyrlar aýrýlarynyń qaýpin mashınalyq oqytý modelderi arqyly boljaý, KazLib bilim berý platformasy, mıkrobtyq otyn elementterin JI kómegimen modeldeý, Arduino UNO bazasynda órt sóndirgish robot jasaý syndy jobalar tanystyryldy.
Sonymen birge, Ulttyq ǵylym akademııasynyń jańadan saılanǵan akademıkteri men sheteldik músheleri ǵylymı qaýymdastyqqa resmı tanystyrylyp, dıplomdary men tósbelgileri tabystaldy. Bul rásim jas zertteýshiler men ǵylym korıfeıleri arasyndaǵy sabaqtastyqty nyǵaıtyp, ǵylymdaǵy býynaralyq baılanystyń mańyzyn aıqyndady. Oǵan qosa QR UǴA 80 jyldyq mereıtoılyq tósbelgileri tabystalyp, ǵylymdy damytýǵa, ǵylymı kadrlardy daıarlaýǵa jáne otandyq ǵylymı áleýetti nyǵaıtýǵa eleýli úles qosqan ǵalymdar marapattaldy.
Forým aıasynda jas zertteýshilerdiń ǵylymı jobalary, baıandamalary jáne shyǵarmashylyq jumystary baǵalanyp, úzdik qatysýshylar marapattaldy. Sondaı-aq ǵylymı-fantastıkalyq komıkster konkýrsynyń jeńimpazdary men «Jas Qanysh» respýblıkalyq oqýshylar baıqaýynyń júldegerleri ataldy.
Aıta keteıik, búgin elimizdiń ár óńirinen kelgen 100 oqýshy Aqordany aralady. Olardyń arasynda pán olımpıadalarynyń jeńimpazdary men júldegerleri, oqý ozattary, shyǵarmashylyq baıqaýlardyń jáne sport saıystarynyń laýreattary bar.
