Ulttyq fılm mártebesine úmitker 33 joba saraptamalyq keńesten oń baǵa aldy

ASTANA. KAZINFORM — Ulttyq kınony qoldaý memlekettik ortalyǵy kınojobalar pıtchınginiń qorytyndysyn jarııalady, dep habarlaıdy Mádenıet jáne aqparat mınıstrliginiń baspasóz qyzmeti.

Ulttyq kınony qoldaý memlekettik ortalyǵy 9-12 maýsym aralyǵynda Almaty qalasynda konkýrstyq irikteýdiń eki kezeńinen sátti ótken kınojobalardyń pıtchıngin ótkizdi. Ashyq qorǵaý formatynda uıymdastyrylǵan pıtchıngte Saraptama keńesi 99 jobany jan-jaqty taldady.

— Talqylaý sońynda Saraptamalyq keńes daýys berý ótkizdi. Nátıjesinde ulttyq fılm mártebesine úmitker 33 kınojoba oń qorytyndy aldy. Ári qaraı jobalar Vedomstvoaralyq komıssııanyń qaraýyna joldanady, — delingen mınıstrlik taratqan habarlamada.

Bıyl baıqaýǵa qyzyǵýshylyqtyń joǵary bolǵanyn atap ótken jón. Konkýrsqa barlyǵy 444 ótinim tústi, olardyń ishinde kórkem, derekti jáne anımatsııalyq fılmder sektsııasy qamtyldy.

Saraptamalyq keńestiń qaraýyna 357 joba joldandy. Baǵalaý nátıjesinde 128 stsenarıı men stsenarıılik jospar ekinshi kezeńge ótti. Bul kezeńde qatysýshylar tolyq qujattar paketin usyndy. Qorytyndysynda 99 joba pıtchıngke jiberildi.

Budan buryn Ulttyq kınony qoldaý ortalyǵynyń pıtchıngine 100-ge jýyq joba qatysyp jatqany málim boldy.