Ulttyq elektrondy kitaphanany paıdalanýshylar sany 44% artty
ASTANA. KAZINFORM — 2025 jyldyń alǵashqy jartyjyldyǵynda Qazaqstannyń Ulttyq elektrondy kitaphanasy Kazneb.kz platformasynyń damý qarqyny jańa deńgeıge kóterildi, dep habarlaıdy Mádenıet jáne aqparat mınıstrliginiń baspasóz qyzmeti.
— ıAǵnı kontent qaralymynyń sany 4 076 629-ǵa jetip, 30% ósse, paıdalanýshy 379 312, qashyqtyqtan 746 056 paıdalanýshy kirip, 44% artty. Sondaı-aq avtorlardyń ruqsatymen qujattardy júkteý sany 1 mıllıon 600 myńnan asty. Jyl basynan beri elektrondy baza 2 758 qujatpen tolyǵyp, byltyr osy kezeńmen salystyrǵanda 6% kóbeıdi. Búginge deıin 114 842 bet skanerlenip, 362 049 bet redaktsııalandy. Qazaqstandyq Ulttyq elektrondy kitaphana qorynda 81 357 qujat saqtalǵan, 64 tildegi qujattarmen erkin tanysý múmkindigi bar, — delingen mınıstrlik taratqan habarlamada.
Aıta keteıik, QazUEK — qazaqstandyq mazmundaǵy keń kólemdi aqparattar usyna alatyn tuńǵysh memlekettik kitaphanalyq portal. Kez kelgen paıdalanýshy ınternet jelisi arqyly Qazaqstandyq Ulttyq elektrondy kitaphana portalyna tirkelýsiz, erkin, avtorızatsııasyz tolyq mátindi qujattarmen tanysa alady.
QazUEK álemniń 110 elinen paıdalanýshylardyń senim artyp, turaqty qoldanatyn portalyna aınalyp keledi. Negizgi elder qatarynda Qazaqstan, Reseı, Germanııa, AQSh, Ózbekstan, Nıderlandy, Frantsııa, Túrkııa, Qytaı, Ulybrıtanııa jáne t. b. bar. Portal kózi nashar kóretin jandar úshin de qoljetimdi.
Buǵan deıin 20-dan astam mektep kitaphanasynda skanerleýshi robottar jumys isteıtini anyqtaldy.