Ulttyq elektrondy kitaphanany 227 myńnan astam oqyrman paıdalandy

ASTANA. KAZINFORM — Qazaqstan Ulttyq elektrondy kitaphanasyn paıdalanýshylar sany jyl basynan beri 227 446 oqyrmanǵa jetti. Avtorlardyń ruqsatymen júktelgen qujattar kórsetkishi 329 485 bolsa, jalpy materıaldar 1 408 540 ret qaraldy. Bul týraly Mádenıet jáne aqparat mınıstrligi málim etti. 

Ulttyq elektrondy kitaphanany álemniń ártúrli elderindegi paıdalanýshylar da qoldanady. Olardyń qatarynda Qytaı, Reseı, AQSh, Vetnam, Ózbekstan, Túrkııa, Nıderland, Frantsııa jáne Qyrǵyzstan memleketterinen tirkelgen oqyrmandar bar. 

Vedomstvonyń málimetinshe, kitaphana qory 64 tildegi 84 664 qujatty quraıdy. Onyń ishinde túrli baǵyttaǵy kitaptar, maqalalar, gazet-jýrnaldar, dıssertatsııalar, nota jáne aýdıo-vıdeolar men arhıvtik qujattar jınaqtalǵan.

QazUEK – qazaqstandyq mazmundaǵy keń kólemdi aqparattar usyna alatyn tuńǵysh memlekettik kitaphana portaly. Portaldyń ereksheligi – kórý qabileti buzylǵan jandarǵa beıimdelip jasalýynda. Kez kelgen paıdalanýshy portalǵa tirkelýsiz tolyq mátindi qujattarmen tanysa alady.

Aıta keteıik, kitaphanalarǵa kelýshiler sany 57 mln-ǵa jetti.