Ulttyq ekonomıka vıtse-mınıstrleri qaza tapqan «Qazaqmys» kenshileriniń otbasylaryna barsyn — depýtat
ASTANA. KAZINFORM — Májilis depýtaty Arman Qalyqov Premer-mınıstr Oljas Bektenovtiń atyna «Qazaqmys» korporatsııasynyń shahtasyndaǵy jeti kenshiniń ólimine baılanysty saýal joldady.
— «Qazaqmys» korporatsııasynyń Ulytaý oblysyndaǵy kenishinde bolǵan qaıǵyly oqıǵa búkil eldi dúr silkindirdi. «Qazaqmys» kásiporyndarynda jıilep ketken jazataıym oqıǵalar ónerkásiptegi qaýipsizdik máselelerine durys kóńil bólmeýdiń tikeleı saldary ekeni anyq.
Mysaly, 2023 jyly Balqash mys balqytý zaýyty men Shyǵys Jezqazǵan kenishiniń № 57 shahtasynda montajshy men taý-ken sheberi qaza tapty. Qarasha aıynda № 2 Jezqazǵan baıytý fabrıkasynda bir áıel kóz jumdy. Al Jambyl oblysyndaǵy «Jaısań» kenishinde eki kenshi qaıtys boldy. 2024 jyldyń qazan aıynda Balqash óńirindegi «Saıaq-3» shahtasynda kómirtegi totyǵynyń shyǵarylýynan taǵy eki shahter qaza tapty. Endi mine jeti adamnyń ómirin qıǵan jańa tragedııaǵa kýá bolyp otyrmyz. Gaz jarylysy týraly boljamdy aqparat erekshe alańdatyp otyr. Onyń mys óndirý kenishinde bolýy tabıǵı turǵyda múmkin emes. Bul qaýipsizdik erejeleri buzylǵanyn kórsetedi, — dedi depýtat.
Onyń sózinshe shahtadaǵy qaıǵyly oqıǵanyń tyıylmaýyna Úkimet te «úles qosyp» otyr.
— Biz ónerkásiptik qaýipsizdik salasyndaǵy baqylaý men qadaǵalaýdy kúsheıtý boıynsha zańnamalyq normalardy usyndyq. Biraq, Úkimet, onyń ishinde Ulttyq ekonomıka mınıstrligi bul mańyzdy zańnamalyq bastamany qoldamady. Endi mınıstr men Ulttyq ekonomıka vıtse-mınıstrleri qaza tapqan «Qazaqmys» kenshileriniń otbasylaryna barsyn, — dedi Arman Qalyqov.
Depýtat qyzmetkerlerdiń ómirin saqtandyrý máselesin de kóterdi.
— Ónerkásipte qaýipsizdikti qamtamasyz etý fýnktsııalaryn salalyq mınıstrlikterden alyp, Premer-Mınıstrge tikeleı esep beretin memlekettik organdy qurý jónindegi máselelerdi qaraý kerek. Qaýipti óndiristerde jumys isteıtin qyzmetkerlerdiń ómiri men densaýlyǵyn saqtandyrý júıesin jetildirý jóninde sharalar qabyldaýdy usynamyz. Apattyń sebepterine gaz qaýipsizdigi jónindegi sarapshylardy tarta otyryp, muqııat jáne táýelsiz tergeý júrgizilsin. Kenishterdiń jeldetý júıelerin tekserý kerek, — dedi depýtaty.
Buǵan deıin «Jomart» shahtasy tergeý aıaqtalǵansha jabyq bolatyny aıtylǵan edi.