Ulttyq ekonomıka mınıstriniń eks-orynbasary 5 jylǵa sottaldy

Medeý aýdanynyń №2 sotynda Ulttyq ekonomıka eks-vıtse-mınıstri Іlııas Óserovke (Almaty qalasy ákiminiń burynǵy orynbasary), Ulttyq qaýipsizdik komıteti departamenti bastyǵynyń burynǵy orynbasary Talǵat Muhanovqa jáne Almaty qalasy Qarjy basqarmasynyń eks-basshysy Aınur Qudaıbergenovaǵa qatysty sot protsesi aıaqtaldy, dep habaralıdy QazAqparat tilshisi.

«Sotta anyqtalǵanyndaı, UQKD orynbasary aldaý jolymen Almaty qalasy ákiminiń orynbasary Ó. jáne Memlekettik aktıvter basqarmasynyń basshysy Q. arqyly sot úkimi boıynsha tárkilengen 5 múlik nysanyn kórineý tómendetilgen baǵamen ıelengen», – dep málim etti qalalyq sottan.

Aıyptalýshylar óz kinálaryn moıyndamady. Sottan ózderin aqtaýdy surady.⠀

Olardyń kinási is boıynsha jınalǵan aıǵaqtar, kýágerlerdiń jaýaptary, sot saraptamalarynyń jáne aýdıtorlyq qorytyndy arqyly dáleldendi.

Sot aıyptalýshylardy kináli dep tanyp, kelesideı jaza taǵaıyndady:

• Ulttyq qaýipsizdik komıtetiniń Almaty qalasy boıynsha departamenti bastyǵynyń burynǵy orynbasary Talǵat Muhanovqa – memlekettik qyzmette laýazymdardy atqarý quqyǵynan jáne Ulttyq qaýipsizdik komıtetiniń polkovnıgi ataǵynan ómir boıyna aıyra otyryp, 8 jylǵa bas bostandyǵynan aıyrý;
• Ulttyq ekonomıka eks-vıtse-mınıstri Іlııas Óserovke – memlekettik qyzmette laýazymdardy atqarý quqyǵynan ómir boıyna aıyra otyryp, 5 jylǵa bas bostandyǵynan aıyrý;
• Almaty qalasy Qarjy basqarmasynyń burynǵy basshysy Aınur Qudaıbergenovaǵa – memlekettik qyzmette laýazymdardy atqarý quqyǵynan ómir boıyna aıyra otyryp, 5 jylǵa bas bostandyǵynan aıyrý.

«Jaza taǵaıyndaý kezinde sot jaýapkershilikti jeńildetetin mán-jaılardy – sottalýshylarda sottylyqtyń joqtyǵyn, kámeletke tolmaǵan jáne kishkentaı balalarynyń bolýyn, sondaı-aq bir sottalýshy M.-niń (T.Muqanovtiń) zalaldy óteýin eskerdi», – dep atap ótti qalalyq sottan.

Sottalǵandar jazany qaýipsizdigi ortasha mekemede óteıdi.

Úkim zańdy kúshine engen joq.