Ulttyq ekonomıka mınıstrliginiń keıbir fýnktsııalary ózgerdi
ASTANA. KAZINFORM – Úkimettiń 2024 jylǵy 13 shildedegi qaýlysy qabyldandy. Qaýlyda Ulttyq ekonomıka mınıstrliginiń quzyretine ózgerister engizilgen.
Qujatqa sáıkes, endi mınıstrlik kelesi fýnktsııalardy oryndaıdy:
- memlekettik organdarǵa qatysty QR Kásipkerlik kodeksiniń 85-2-babyna sáıkes kásipkerlik sýbektilerin qorǵaý salasynda memlekettik baqylaýdy júzege asyrý;
- kásipkerlik sýbektilerin qorǵaý salasynda merzimdi tekserýler júrgizýdiń jartyjyldyq josparlaryn bekitý;
- merzimdi tekserýler júrgizýdiń jartyjyldyq josparynyń nysanyn, tekserýlerdi taǵaıyndaý, uzartý, toqtata turý jáne qaıta bastaý týraly aktilerdiń nysandaryn, tekserý merzimin uzartý týraly habarlamanyń nysanyn, kásipkerlik sýbektilerin qorǵaý salasyndaǵy merzimdi, jospardan tys tekserý jáne qashyqtyqtan baqylaý nátıjeleri týraly qorytyndylardyń nysandaryn ázirleý jáne bekitý;
- birneshe salalyq memlekettik organdardyń quzyretine jatatyn ekonomıkanyń túrli salalarynda usynylatyn jeke kásipkerlik sýbektilerine memlekettik qarjylyq jáne múliktik qoldaý kórsetý úshin qajetti qoldaý tártibin, nysandaryn, mólsherin jáne basqa da jaǵdaılardy ázirleý;
- birneshe salalyq memlekettik organdardyń quzyretine jatatyn ekonomıkanyń túrli salalarynda usynylatyn jeke kásipkerlik sýbektilerine memlekettik qarjylaı emes qoldaý kórsetý úshin qajetti qoldaý tártibin, nysandaryn jáne basqa da jaǵdaılardy ázirleý;
- retteýshi memlekettik organdar aıqyndaıtyn retteýshi aktilerge keıinnen taldaý júrgizý merzimderin kelisý;
- energııa berýshi uıymdar bir kúntizbelik jylǵa bir tutynýshyǵa shaqqandaǵy ajyratýlar sanynyń ortasha kórsetkishin jáne bir kúntizbelik jylǵa bir tutynýshyǵa shaqqandaǵy ajyratýlar uzaqtyǵynyń ortasha kórsetkishin asyrǵan jaǵdaıda tutynýshy paıdalanǵan elektr energııasy úshin buryn óndirilgen somany qaıta esepteý nemese qaıtarý jolymen elektr qondyrǵylarynyń belgilengen qýaty 200 kVt deıingi kásipkerlik sýbektilerine avtomatty óteý ádistemesin ázirleý jáne bekitý.
Sondaı-aq, vedomstvonyń keıbir fýnktsııalary qaıta qaraldy. Atap aıtqanda mınıstrlik:
- jeke kásipkerlik sýbektilerine memlekettik qoldaý kórsetý kezinde talaptardyń saqtalýy turǵysynan jeke kásipkerlik sýbektilerin qoldaý salasynda memlekettik baqylaýdy júzege asyrady;
- retteýshilik taldaýdy júrgizip, paıdalaný qaǵıdalaryn ázirleıdi jáne bekitedi;
- ortalyq memlekettik, jergilikti ókildi jáne atqarýshy organdar ázirleıtin normatıvtik quqyqtyq aktilerdiń jobalaryn, Qazaqstan Respýblıkasynyń halyqaralyq sharttarynyń jobalaryn, memlekettik josparlaý júıesi salasyndaǵy quqyqtyq aktilerdiń jobalaryn, sondaı-aq jeke kásipkerlik sýbektileriniń múddesin qozǵaıtyn, Qazaqstan Respýblıkasynyń qatysýshysy bolýǵa nıettenetin halyqaralyq sharttardyń saraptamalyq keńesteriniń qaraýyn uıymdastyrady.
Qaýly 2024 jylǵy 28 shildeden bastap qoldanysqa enedi.
