Ulttyq ekonomıka mınıstrligi taksı qyzmetine qatysty erejege ózgeris engizdi
ASTANA. KAZINFORM - QR Ulttyq ekonomıka mınıstrligi taksı tasymaldaýshylardyń habarlama berý erejesine ózgeris engizdi, dep habarlaıdy mınıstrliktiń baspasóz qyzmeti.
Endi tasymaldaýshy taksı qyzmetin bastamas buryn jergilikti atqarýshy organǵa habarlama jiberýge mindetti. Sonymen qatar, jańartylǵan nysanda kólik quraly aýystyrylǵanda jáne jańadan kólik qosylǵanda, ıaǵnı avtoparkti jańartý kezinde ózgeris engizý múmkindigi qarastyrylǵan.
Burynǵy tártip boıynsha, tasymaldaýshy belgili bir kólik quralyna baılanbaıtyn. Bul jol-kólik oqıǵasy kezinde jolaýshylarǵa nemese úshinshi tulǵaǵa zııan keltirilgen jaǵdaıda jaýapty adamdy anyqtaýdy qıyndatatyn.
Osyǵan baılanysty habarlama nysany kólik quralynyń markasyn, memlekettik tirkeý nómirin jáne shyǵarylǵan jylyn kórsetetin málimetpen tolyqtyryldy.
-Bul shara jolaýshylardy tasymaldaý qaýipsizdigine jaýapty taksı tasymaldaýshysyn jedel sáıkestendirýge, sondaı-aq naryqqa zańsyz qatysýshylardyń úlesin qysqartýǵa múmkindik beredi,-delingen habarlamada.
Aıta keteıik, atalǵan ózgerister «Memlekettik organdardyń habarlamalar nysandaryn jáne habarlamalardy qabyldaý qaǵıdalaryn bekitý týraly, sondaı-aq habarlamalardy qabyldaýdy júzege asyratyn memlekettik organdardy aıqyndaý týraly» Qazaqstan Respýblıkasy Ulttyq ekonomıka mınıstriniń 2015 jylǵy 6 qańtardaǵy № 4 buıryǵyna ózgerister engizý týraly» buıryqqa engizildi.
Osyǵan deıin senator Bıbigúl Jeksenbaı taksıde jumys isteıtinderdiń quqyǵyn qorǵaýdy kúsheıtý kerektigin aıtqan bolatyn.
