Ulttyq ekonomıka mınıstrligi kóleńkeli aınalymmen kúresti kúsheıtedi
ASTANA. KAZINFORM — Arnaıy salyq rejımin qoldaný tetikteri barlyq sala boıynsha qaıta qaralyp jatyr. Bul sheshimniń basty maqsaty kóleńkeli aınalymdy azaıtyp, artyq deldaldyq tizbekterdi qysqartý. Bul týraly Ulttyq ekonomıka birinshi vıtse-mınıstri Azamat Ámrın málimdedi.
— Biz tek jekelegen qyzmet túrleri nemese salalar boıynsha emes, jalpy barlyq baǵytta jumys júrgizip jatyrmyz. Eger burynǵydaı bárine ruqsat bere bersek, qaıtadan tabysty bólshekteý men jasandy ońtaılandyrýǵa jol ashamyz. Sondyqtan bul baǵytta naqty sheshim qabyldandy, — dedi ol EQJJ boıynsha jeńildetilgen deklaratsııa qoldanýǵa tyıym salý máselesin talqylaýǵa arnalǵan dóńgelek ústel barysynda.
Vıtse-mınıstrdiń aıtýynsha, jańa tásil baǵa saıasatyna da oń áser etedi.
— Biz baǵanyń ósý sebepterin taldadyq. Mysaly, et pen sút ónimderi boıynsha óndirýshi men iri saýda jelileri arasyndaǵy deldaldar baǵany negizsiz ósirip kelgen. Endi jeńildetilgen deklaratsııa boıynsha jumys isteıtin deldaldarǵa burynǵydaı artyqshylyq berilmeıdi. Bul — óndirýshige tikeleı naryqqa shyǵýǵa múmkindik beredi. Demek, qosymsha tabys óndirýshiniń ózinde qalady, — dedi Ámrın.
Sonymen qatar ol salyq júktemesin aýmaqtyń ereksheligine qaraı máslıhattar retteı alatynyn atap ótti.
— Mysaly, aýyldyq aımaqta nemese óndiristik aımaqtarda salyq mólsherlemesin tómendetýge bolady. Al iri qaladaǵy saýda ortalyqtary úshin kerisinshe, joǵary mólsherleme oryndy. Bul ádil ári teńgerimdi tásil, — dedi ol.
Azamat Ámrınniń aıtýynsha, qabyldanǵan sheshimder iri jáne orta bıznes arasyndaǵy tepe-teńdikti saqtap, óndirýshini qoldaýǵa baǵyttalǵan.
Buǵan deıin Qarjy mınıstri salyqtan jaltarǵan kásipkerler týraly aıtqan bolatyn.