Ulttyq ekonomıka mınıstrligi EQDB-men birlesip, orta bıznesti qoldaýdy kúsheıtpek
ASTANA. KAZINFORM - Astanada Qazaqstan Respýblıkasy Ulttyq ekonomıka mınıstrligi men Eýropalyq Qaıta qurý jáne damý banki arasynda Shaǵyn jáne orta bıznesti qoldaý baǵdarlamalaryn úılestirý komıtetiniń jyl saıynǵy XIII otyrysy ótkizildi.
Otyrys jumysyna Ulttyq ekonomıka vıtse-mınıstri Erlan Saǵynaev qatysty.
Óz sózinde ol 2013 jyldan bastap yntymaqtastyq sheńberinde kásipkerlikti damytýǵa, konsýltatsııalyq qoldaýdy kúsheıtýge, jańa jumys oryndaryn qurýǵa arnalǵan baǵdarlamalar dáıekti túrde iske asyrylyp kele jatqanyn atap ótti.
Osy kezeńde 2,7 myńnan astam konsaltıngtik joba qarjylandyrylyp, 300-den astam oqytý is-sharasy ótkizilgen. Qoldaýdyń arqasynda 10 myńǵa jýyq jumys orny qurylyp, kásiporyndardyń 17% - y jobalardy iske asyrǵannan keıin bir jarym jyl ishinde iri bıznes segmentine kóshti.
2025 jylǵy 20 qańtarda Mınıstrlik EQDB-men baǵdarlamany 2030 jylǵa deıin uzartý týraly qosymsha kelisimge qol qoıdy.
-Eýropalyq Qaıta qurý jáne damý bankimen yntymaqtastyq shaǵyn jáne orta bıznesti qoldaýdyń mańyzdy quraly bolyp qala beredi. Baǵdarlamany 2030 jylǵa deıin uzartý ózara senim men odan arǵy nátıjelerge baǵyttalǵandyǵyn rastaıdy. Biz iske asyrylyp jatqan jobalardyń naqty áserin kórip otyrmyz. Ol jańa jumys oryndary, kompanııalardyń ósýi jáne olardyń naryqtaǵy pozıtsııalarynyń nyǵaıýy, - dep atap ótti Erlan Saǵynaev.
Tabysty iske asyrýdy eskere otyryp, odan ári ósý áleýeti bar kompanııalarǵa baǵdarlanǵan «Orta kásipkerlik kásiporyndarynyń ınvestıtsııalyq tartymdylyǵyn arttyrý» atty qoldaýdyń jańa baǵytyn iske qosý týraly sheshim qabyldandy.
EQDB-nyń Ortalyq Azııa men Mońǵolııadaǵy konsýltatsııalyq qyzmetter baǵdarlamasynyń basshysy Sımone Ze Atanasovskı búginde óz salasynda kóshbasshy bolyp tabylatyn jáne Qazaqstanda odan ári ósýge nıetti ınvestıtsııalyq áleýetti arttyrý jobasy sheńberinde orta kásiporyndardy qoldaýǵa erekshe nazar aýdarylatynyn atap ótti.
Іs - shara barysynda baǵdarlamaǵa qatysýshy kásipkerlermen ashyq dıalog júrgizildi. Bıznes ókilderi eksporttyq múmkindikterdi keńeıtýdegi, ónerkásiptik sektordy damytýdaǵy jáne ınnovatsııalyq jobalardy iske asyrýdaǵy memlekettik qoldaýdyń mańyzdylyǵyn atap ótti.
Osyǵan deıin shaǵyn bızneske qoldaý retinde otandyq ónimge basymdyq berý usynylǵany týraly jazdyq.