Ulttyq ekonomıka mınıstrligi 6 aıdan astam bos turaǵan shtatty qysqartady

ASTANA. KAZINFORM — Ulttyq ekonomıka mınıstrligi memlekettik sektordyń vedomstvolyq baǵynysty uıymdaryndaǵy kadr resýrstaryn basqarýdy ońtaılandyrýǵa baǵyttalǵan buıryqty bekitti. 

Mınıstrlik málimetinshe, qujat bir mezgilde eńbekaqy tóleý qoryn túzete otyryp, 6 aıdan astam bos turǵan shtat birlikterin qysqartýdy kózdeıdi.

Bul rette normalar birinshi basshylardyń, maýsymdyq qyzmetkerlerdiń, ıadrolyq fızıka, joǵary tehnologııalyq jabdyqtar boıynsha nemese sırek kezdesetin ınjenerlik maman sııaqty onsyz uıymnyń jumys isteýi múmkin emes biregeı óndiristik jáne joǵary mamandandyrylǵan qyzmetkerlerdiń laýazymdaryna, sondaı-aq eńbek zańnamasyna sáıkes jumys ornyn saqtaý jaǵdaıynda qoldanylmaıdy.

Ózgerister kezinde uıymdardyń damý josparyna túzetýler engizýdiń tártibi belgilendi. Uzaq ýaqyttan beri jarııalanǵan bos jumys orny anyqtalǵan kezde, atqarýshy organ bos jumys ornyn qysqartý men eńbekaqy tóleý qory týraly málimetti qosa alǵanda usynylǵan ózgeristi negizdeı otyryp, naqtylanǵan damý josparyn usynýǵa mindetti. Naqtylanǵan jospardy qaraý men bekitý belgilengen merzimde, osy jylǵy 25 maýsym men 25 jeltoqsannan keshiktirilmeı júzege asyrylady.

Sondaı-aq esep berýge qoıylatyn talap ta naqtylandy. Uıymdar personal men eńbekaqy tóleý qory týraly málimetti, onyń ishinde bos shtat birligin qysqartý týraly derekti kórsetedi.

— Qabyldanyp otyrǵan bul sharalar kadr protsesteriniń ashyqtyǵyn arttyrýǵa, bıýdjet qarajatyn utymdy paıdalanýǵa jáne memlekettik uıymdardaǵy adamı resýrsty basqarý tártibin kúsheıtýge arnalǵan, — dep atap ótedi vedomstvodan. 

Aıta ketelik jumysshy mamandyqtar jyly qandaı ońtaıly nátıje bolǵany týraly jazǵan edik.