Ulttyq ekonomıka mınıstri respýblıkalyq bıýdjettiń kiris somasyn atady
ASTANA. KAZINFORM – Bıyl respýblıkalyq bıýdjettiń kiristeri 14,1 trln teńge kóleminde baǵalanady, bul bekitilgen jospardan 2 trln teńgege tómen. Onyń sebebin Premer-Mınıstrdiń orynbasary – Ulttyq ekonomıka mınıstri Nurlan Baıbazarov túsindirdi.
«2024–2028 jyldarǵa arnalǵan áleýmettik-ekonomıkalyq damý boljamy sheńberinde 2024 jylǵa arnalǵan respýblıkalyq bıýdjet pen Ulttyq qor parametrleriniń naqtylanǵan boljamy engiziledi. 2024 jylǵa arnalǵan makro kórsetkishter boljamyn qalyptastyrýdyń bastapqy parametrleri el ekonomıkasynyń aǵymdaǵy damýyna sáıkes keledi. Bıyl 10 aıdyń qorytyndysy boıynsha munaıdyń ortasha baǵasy barreline 80,5 AQSh dollary deńgeıinde qalyptasty, ortasha jyldyq teńge baǵamy AQSh dollary úshin 461,4 teńge boldy», - dedi Nurlan Baıbazarov Májilistiń jalpy otyrysynda.
Mınıstrdiń aıtýynsha, 2024 jylǵa arnalǵan bastapqy parametrler burynǵy deńgeıde, munaı baǵasy – barreline 80 AQSh dollary, esep aıyrysý baǵamy – 460 AQSh dollary, ınflıatsııa 6-8 paıyz deńgeıinde saqtaldy.
«2024 jylǵa arnalǵan makro kórsetkishterdiń parametrleri 2024-2028 jyldarǵa arnalǵan maquldanǵan boljam sheńberinde saqtaldy. Respýblıkalyq bıýdjettiń kiristeri 14,1 trln teńge kóleminde baǵalanady, bul bekitilgen jospardan 2 trln teńgege tómen», - deıdi ol.
Odan ári Ulttyq ekonomıka mınıstri kirister boıynsha boljamdy tómendeý sebebin túsindirdi.
– 2025 jylǵa bolashaq keńeıtý jobasyn iske qosýdy keıinge qaldyrýǵa baılanysty munaı óndirý kóleminiń 5,1 mln tonnaǵa azaıýy;
– Bıyl qosymsha qun salyǵyn qaıtarý somasynyń ulǵaıýy;
– syrtqy saýda aınalymynyń tómendeýi.
«Negizgi tómendeý korporatıvtik tabys salyǵyna, qosylǵan qun salyǵyna jáne munaıǵa eksporttyq kedendik baj salyǵyna tıesili. Bul salyqtar bıýdjetke túsetin salyqtyq túsimderdiń basym bóligin quraıdy, ıaǵnı qosylǵan qun salyǵynyń úlesi 45,9 paıyz, korporatıvtik tabys salyǵy 29 paıyz jáne munaıǵa eksporttyq kedendik baj salyǵy 10,8 paıyz. Qosylǵan qun salyǵy boıynsha bekitilgen josparǵa qaraǵanda túsimderdiń 1,5 trln teńgege tómendeýi, bıýdjetten qosylǵan qun salyǵyn qaıtarýdy 595 mlrd teńgege ulǵaıýy, ımport kóleminiń 8,3%-ǵa tómendeıtini boljandy. Munaıǵa eksporttyq kedendik baj boıynsha munaı óndirýdi 95,4 mln tonnadan 90,3 mln tonnaǵa deıin azaıý sebebinen túsimniń 266 mlrd teńgege tómendeýi boljanyp otyr», - deıdi ol.
Aıta ketsek, 21 qarashada Senat respýblıkalyq bıýdjet týraly zańdy Májiliske qaıtardy.
