Ulttyq dombyra kúnine oraı polıtsııa qyzmetkerleri Medeý muz aıdynynda kúı shertti
ASTANA. KAZINFORM – Ulttyq dombyra kúnine oraı jáne Qazaqstan polıtsııasynyń 33 jyldyǵyna arnalǵan ımıdjdik-ıdeologııalyq naýqan aıasynda Almaty qalalyq polıtsııa departamentiniń qyzmetkerleri ońtústik astananyń sımvoldarynyń biri – Medeý muz aıdynynda biregeı patrıottyq is-shara ótkizdi.
Atalǵan naýqan barysynda ІІM M.Esbolatov atyndaǵy akademııasynyń kýrsanttary men 80 polıtsııa qyzmetkeri «Balbyraýyn» kúıin oryndap, qaısarlyq, birlik pen qyzmetke adaldyq tanytty.
Іs-shara Otanǵa qyzmet etý tek tártipti saqtaý ǵana emes, sonymen qatar ulttyq qundylyqtardy, salt-dástúrlerdi, mádenı muralardy qurmetteý ekenin eske saldy.
– Ulttyq dombyra – meıirimdilik qana emes, tarıhqa, mádenıetke, osy jer betinde birge ómir súrip jatqan halyqqa degen qurmet. Medeý sekildi jerde orkestrlik oryndaý – Qazaqstan polıtsııasynyń ishki qýatyn, birligin jáne halyqpen baılanysyn bildiredi. Biz jastardyń óz eli men óz polıtsııasymen maqtanǵanyn qalaımyz, - deıdi uıymdastyrýshylar.
Aıta keteıik, buǵan deıin «Medeý» muz aıdyny bıylǵy syrǵanaý maýsymynan keıin birneshe jylǵa jabylatynyn jazǵan edik.