Ulttyq dombyra kúnine oraı qyzylordalyq oqýshylar qoǵamdyq kólikterde kúı oryndady

QYZYLORDA. KAZINFORM – Qyzylorda qalasyndaǵy qoǵamdyq kólikterde jas ónerpazdar Ulttyq dombyra kúnine oraı kúı oryndap, jolaýshylardyń qulaq quryshyn qandyrdy. Bul týraly qalalyq qoǵamdyq damý bóliminen habarlady.

- Búgin qyzylordalyq jas dombyrashylar ulttyq rýhty oıatqan tamasha bastamamen halyqty qýantty. Avtobýs ishinde kúmbirlete tógilgen «Balbyraýyn» kúıi jolaýshylardyń kóńilin kóterip, keremet atmosfera syılady. Jas kúıshiler osyndaı ıgi bastama arqyly el ishinde ulttyq ónerdi dáripteýge úlken úles qosyp júr, - delingen habarlamada.

Jolaýshylarǵa merekelik kóńil-kúı syılaǵan — Mádına Eralıeva atyndaǵy Qyzylorda qalalyq mádenıet úıindegi «Balbulaq» dombyra úıirmesiniń qatysýshylary.

- Biz 10 men 14 jas aralyǵyndaǵy mektep oqýshylarynyń boıyna qara dombyranyń qasıetin sińirýge tyrysamyz. Balalardyń ulttyq aspapty úırenýge ynta-yqylasy joǵary. Úıirmede onǵa jýyq bala bar. Olar búgin qoǵamdyq kólikterde Qurmanǵazynyń «Balbyraýyn» kúıin oryndap, qala turǵyndarynyń merekelik kóńil-kúıdi sezinýine yqpal etti, - dedi úıirme jetekshisi Arý Ospanova.

Buǵan deıin qoǵamdyq kólikterde mádenıet úıine qarasty ájeler ansambli óner kórsetken. Osy joly shyǵarmashylyq ujym ózderin basqasha qyrynan kórsetkisi kelip, balalardyń ónerin ortaǵa saldy.

Al keshe Qyzylordada Ulttyq dombyra kúnine oraı Myrza Toqtabolatulynyń 175 jyldyǵyna arnalǵan «Syr tolqyny» atty II respýblıkalyq kúıshiler baıqaýy ótti.