Ulttyq dombyra kúnine oraı Qazaqstanda 2000-nan astam mádenı is-shara ótedi
ASTANA. KAZINFORM — Ulttyq dombyra kúnine oraı elimizdiń barlyq óńirinde mádenı baǵdarlama uıymdastyrylyp jatyr. Onyń aıasynda kontsertter, festıvalder, kúıshi jáne dombyrashylar baıqaýlary, kórmeler, ǵylymı konferentsııalar, mýzeıler men kitaphanalardaǵy arnaıy jobalar, shyǵarmashylyq kezdesýler men tanymdyq is-sharalar bar. Bul týraly Mádenıet jáne aqparat mınıstrligi málim etti.
Elimiz boıynsha 2000-nan astam is-shara ótkizý josparlanǵan. Onyń ishinde 20-y respýblıkalyq, 98-i oblystyq deńgeıde uıymdastyrylady. Qalǵan is-sharalar aýdan ortalyqtary men aýyldyq eldi mekenderde, sondaı-aq jergilikti mádenıet uıymdarynda ótedi. Merekelik is-sharalarǵa 2 mıllıonnan astam adam qatysady dep josparlanyp otyr.
Ulttyq dombyra kúni jyl saıyn shilde aıynyń alǵashqy jeksenbisinde atalyp ótedi. 2018 jyly Memleket basshysynyń bastamasymen bekitilgen bul mereke ulttyq biregeılikti nyǵaıtýǵa, jastardyń dástúrli ónerge qyzyǵýshylyǵyn arttyrýǵa jáne urpaqtar sabaqtastyǵyn saqtaýǵa baǵyttalǵan.
Bıylǵy mereke jańa Konstıtýtsııa kúshine engennen keıingi kezeńmen tuspa-tus kelip otyr. Jańarǵan Ata zań halyqtyń birligin bekemdep, ulttyq qundylyqtar men mádenı murany ulyqtaıtyn memlekettik damýdyń jańa kezeńine jol ashty.
Prezıdent Qasym-Jomart Toqaev dombyranyń ulttyq mádenıetti saqtaýdaǵy mańyzyna toqtalǵan bolatyn. Memleket basshysy Ulttyq dombyra kúni qazaq halqynyń bolmysyn aıshyqtap, jas urpaqtyń ulttyq rýhyn kóteretin mańyzdy mereke ekenin atap ótti.
Prezıdent óz sózinde: «Naǵyz qazaq – dombyra», – dep, qasıetti dombyra Qazaqstannyń álemge tanylatyn biregeı brendine aınalýǵa tıis ekenin aıtty.
Merekelik is-sharalar Astana, Almaty, Shymkent qalalary men barlyq oblysta ótedi. Kásibı shyǵarmashylyq ujymdardyń, ulttyq aspaptar orkestrleriniń jáne jas oryndaýshylardyń qatysýymen kontsertter, festıvalder men buqaralyq mádenı jobalar uıymdastyrylady.
5 shildede Astana qalasyndaǵy Amfıteatrda Ulttyq dombyra kúnine arnalǵan merekelik kontsert ótedi. Almatyda merekelik baǵdarlamalar birneshe ashyq alańda ótkiziledi. Qurmanǵazy atyndaǵy Qazaq ulttyq halyq aspaptar orkestri Arbatta, «Alataý» dástúrli óner teatrynda jáne Ortalyq saıabaqta óner kórsetedi. Al Qazaqstan Respýblıkasynyń «Saltanat» memlekettik bı ansambli «Kúmbirle, dombyra, Jasaı ber, Astana» atty kontserttik baǵdarlamasyn usynady.
Shymkent qalasynda merekelik kontsert «Shym Sıtı» saıabaǵynda ótedi. Bıylǵy merekeniń halyqaralyq baǵdarlamasy da aýqymdy. Ulttyq dombyra kúni Qytaı astanasy Beıjińde de atalyp ótedi. Lıanma ózeniniń jaǵalaýynda Qazaqstannyń mádenı ortalyǵy uıymdastyratyn Dombra Party is-sharasynda sheteldik kórermenderge qazaqtyń dástúrli óneri tanystyrylady.
Respýblıkalyq deńgeıdegi negizgi is-sharalar qatarynda Túrkistan oblysynda ótetin «Kúı qudireti» kúıshiler baıqaýy, Qyzylorda oblysyndaǵy III respýblıkalyq «Syr tolqyny» kúıshiler baıqaýy, Dına Nurpeıisovanyń 165 jyldyǵyna arnalǵan «Ásemqońyr» respýblıkalyq dombyrashylar baıqaýy jáne Soltústik Qazaqstan oblysynda uıymdastyrylatyn V halyqaralyq «Quzyljar Music Fest» festıvali bar.
4 shildede Qazaqstan Respýblıkasy Mádenıet jáne aqparat mınıstrliginiń bastamasymen ótetin respýblıkalyq #dombrakuni chellendji merekelik baǵdarlamanyń mazmunyn aıshyqtaı túsedi. Chellendjge qatysýshylar áleýmettik jelilerde uzaqtyǵy bir mınýtqa deıingi dombyra úni, ulttyq óner men merekelik kóńil kúıdi dáripteıtin beınerolıkterdi #dombrakuni heshtegimen jarııalaı alady.
