Ulttyq dombyra kúnine arnalǵan is-sharalarǵa 2 mıllıonnan astam adam qatysty
ASTANA. KAZINFORM — Qazaqstanda Ulttyq dombyra kúnine oraı aýqymdy mádenı is-sharalar ótti.
Merekelik baǵdarlama elimizdiń barlyq óńirin qamtyp, iri qalalarmen qatar, aýdan ortalyqtarynda, aýyldarda, mádenıet úılerinde, mýzeıler men kitaphanalarda uıymdastyryldy.
El boıynsha 2 myńnan astam is-shara ótkizildi. Onyń ishinde 100-den astam iri mádenı joba uıymdastyryldy. Atap aıtqanda, 30-dan astam kontsert, 10-ǵa jýyq kúıshi men dombyrashylar baıqaýy, 5 festıval, dombyrashylar sherýi, kórmeler, konferentsııalar, mýzeı jáne kitaphanadaǵy jobalar, shyǵarmashylyq kezdesýler, tanymdyq is-sharalar men onlaın aktsııalar ótti. Jalpy is-sharalarǵa 2 mıllıonnan astam adam jınaldy.
Astanada ótken merekelik is-sharalarǵa 10 myńǵa jýyq oqýshy qatysty. Jas dombyrashylar elordanyń kórnekti oryndary men mádenı nysandarynda kúı oryndap, respýblıkalyq mádenı estafetaǵa bastaý berdi.
Almatyda merekelik is-sharalar birneshe ashyq alańda ótti. Negizgi baǵdarlamalardyń biri — «Alataý» dástúrli óner teatry aldynda ótken «Dombyra — dastan» kontserti. Sondaı-aq, Qurmanǵazy atyndaǵy Qazaq ulttyq halyq aspaptar orkestriniń kontsertterin 2 myńnan astam adam tamashalady. Al Arbatta ótken «Kúmbirle, dombyra, jasaı ber, Astana!» kontsertinde Salt Sound folklorlyq ansambli óner kórsetip, keshke 3 myńnan astam kórermen jınaldy.
Shymkentte dombyra úni halyqaralyq áýejaıda, temirjol vokzalynda, avtovokzaldarda, qoǵamdyq kólikterde, aıaldamalarda, saýda oıyn-saýyq ortalyqtarynda, «Shymqala» etnoaýylynda jáne «Shym Sıtı» saıabaǵynda shyrqaldy. Qala turǵyndary úshin kontsertter, kórmeler, sheberlik sabaqtary jáne dombyra jasaýdyń qyr-syry kórsetildi.
Aqtóbede «Qazaq halqyna myń alǵys» stelasy aldyndaǵy alańda 1500 dombyrashy bir mezette kúı oryndady. Keshte Qurmanǵazynyń «Balbyraýyn», «Adaı» kúılerimen birge, Ábdimomyn Jeldibaev pen Aıtqalı Jaıymovtyń shyǵarmalary shyrqaldy.
Óńirlerde kúıshilik mektepterdi saqtaý men jas dombyrashylardy qoldaýǵa basymdyq berildi. Túrkistan oblysynda «Kúı qudireti» respýblıkalyq kúıshiler baıqaýy, Qyzylordada III respýblıkalyq «Syr tolqyny» kúıshiler baıqaýy, al Batys Qazaqstan oblysynda Dına Nurpeıisovanyń 165 jyldyǵyna arnalǵan «Kúı-mura» konferentsııasy men «Ásem qońyr» dombyrashylar baıqaýy ótti.
Jetisý, Qaraǵandy, Qostanaı, Pavlodar, Mańǵystaý, Jambyl, Atyraý jáne ózge de oblystarda kontsertter, fleshmobtar men ónerpazdardyń qatysýymen túrli is-sharalar uıymdastyryldy. Qaraǵandyda «Dombyra — ult qazynasy» kontserti aıasynda 300 dombyrashy qatysqan fleshmob ótse, Qostanaı oblysynda 1000 dombyrashy men 26 qobyzshynyń qatysýymen merekelik baǵdarlama uıymdastyryldy. Qonaev qalasynda belgili ónerpazdar men folklorlyq-etnografııalyq ansamblderdiń qatysýymen kontsert ótti.
Mereke aıasynda mýzeıler men kitaphanalarda da mazmundy jobalar júzege asty. Mádenıet uıymdarynda mýzeı qorlaryndaǵy dombyralar kórmesi, taqyryptyq ekskýrsııalar, mýzykalyq saǵattar, kitap kórmeleri, sheberlermen kezdesýler jáne kúı ónerine arnalǵan dárister uıymdastyryldy.
Semeıdegi «Jıdebaı-Bórili» memlekettik tarıhı-mádenı jáne ádebı-memorıaldyq qoryq-mýzeıinde Abaı Qunanbaıulynyń dombyrasy men ózge de qundy mýzykalyq aspaptar kórmege qoıyldy.
Ulttyq dombyra kúni shetelde de atalyp ótti. Beıjiń qalasyndaǵy Lıanma ózeniniń jaǵalaýynda Qazaqstannyń mádenı ortalyǵy uıymdastyrǵan Dombra Party merekesine qazaqstandyq jáne qytaılyq jas dombyrashylar, stýdentter, qazaq dıasporasynyń ókilderi men jergilikti turǵyndar qatysty.
Sonymen qatar, áleýmettik jelilerde #dombrakuni respýblıkalyq onlaın aktsııasy ótti. Qatysýshylar dombyra úni, ulttyq óner jáne merekelik kóńil kúıdi dáripteıtin beınerolıkter jarııalady.
Aıta ketelik ıÝNESKO Qazaqstan halqyn Dombyra kúnimen quttyqtady.
