Ulttyq dombyra kúni Ulytaý oblysynda atalyp ótti
JEZQAZǴAN. KAZINFORM — Ulttyq dombyra kúnine oraı Ulytaý oblysynda ulttyq ónerdi ulyqtaǵan aýqymdy mádenı is-sharalar ótti.
Óńirdegi aýqymdy is-sharalardyń biri Sátbaev qalasynda uıymdastyryldy. Qala mektepterinen jınalǵan 2000 oqýshy bir mezette «Balbyraýyn» kúıin oryndap, ulttyq ónerge degen qurmettiń jarqyn úlgisin kórsetti. Іs-sharanyń basty maqsaty — jas urpaqtyń boıyna ulttyq qundylyqtardy dáripteý, dombyranyń qadir-qasıetin nasıhattaý jáne qazaqtyń kúı ónerin keńinen tanytý.
Sondaı-aq oblys ortalyǵynda aıtýly merekege oraı ulttyq ónerdiń órisin keńeıtken mazmundy kontserttik baǵdarlama uıymdastyryldy. Sahna tórinde kúmbirlegen kúıler oryndalyp, shyǵarmashylyq ujymdar men ónerpazdar kórermenge erekshe rýhanı áser syılady.
Qarajal qalasynyń kitaphana qyzmetkerleriniń bastamashylyǵymen «Naǵyz qazaq — dombyra» atty aqparattyq kitap kórmesi ótti. Tanymdyq kezdesýge qatysqan «Baldaýren» jazǵy lageriniń tárbıelenýshileri dombyranyń shyǵý tarıhy, qazaq halqynyń rýhanı ómirindegi orny jáne kúı óneriniń kórnekti ókilderi týraly tanymdy maǵlumat aldy.
Ulttyq ónerdi dáriptegen merekelik baǵdarlamalar ishinde Jańaarqa aýdanynda uıymdastyrylǵan is-sharalar aıryqsha oryn aldy. Túgisken aýylynyń I.Omarov atyndaǵy mádenıet úıi janyndaǵy «Serper» dombyra úıirmesiniń qurylǵanyna 10 jyl tolýyna oraı merekelik esep berý kontserti ótti. Kesh barysynda jas kúıshiler qazaqtyń qasıetti qara dombyrasymen kúı shertip, kórermenniń ystyq yqylasyna bólendi. Aýdandyq mádenıet úıinde aýdan ónerpazdary, dombyrashylar men mádenıet qyzmetkerleri qatystýymen kontsert ótti.
Sonymen qatar, Ulytaý aýdandyq mádenıet úıinde «Ulttyq dombyra — ult murasy» atty merekelik is-shara uıymdastyryldy. Bul kúni ulytaýlyqtar qasıetti qara dombyranyń qońyr úni arqyly ulttyq ónerge degen qurmetin aıshyqtap, taǵylymdy kontserttik baǵdarlamany tamashalady. Kúmbirlegen kúıler men rýhty ánder kórermenge erekshe áser syılap, ulttyq qundylyqtarǵa degen súıispenshilikti arttyra tústi.
