Ulttyq dombyra kúni: Astanada qandaı is-sharalar ótedi

Qazaqstanda jyl saıyn shilde aıynyń alǵashqy jeksenbisinde Ulttyq dombyra kúni atalyp ótedi. Bul — qazaq halqynyń rýhanı murasy men tól mádenıetiniń basty nyshandarynyń biri sanalatyn qasıetti dombyraǵa arnalǵan mereke. Bıyl osy ataýly kúnge oraı Astanada mazmundy mádenı baǵdarlama ázirlendi.

2 shilde kúni saǵat 15:00–de Baıqońyr aýdanynyń Qalamgerler alleıasynda Ulttyq dombyra kúnine arnalǵan merekelik kontsert ótedi. Baǵdarlama aıasynda «Altyn dombyra» ansambli qazaqtyń aspaptyq mýzykasynyń tańdaýly týyndylaryn oryndaıdy.

3 shilde kúni saǵat 19:00–de Nurjol jelekjolynda ashyq mıkrofon formatynda Dombyra Party ótedi. Kúı men halyq ánderin oryndaýǵa nıetti kez kelgen turǵyn qatysyp, merekelik keshtiń keshtiń kórkin qyzdyra alady.

5 shilde kúni saǵat 17:00–de Beıbitshilik jáne kelisim saraıynda dástúrli «Asyl mura» kontserti ótedi. Bıyl besinshi ret uıymdastyrylyp otyrǵan mádenı joba qazaqtyń dástúrli mýzyka ónerin keńinen nasıhattaýǵa jáne ulttyq mádenı murany saqtaýǵa baǵyttalǵan.

Kontsert barysynda qazaqtyń dástúrli án-kúı óneriniń Saryarqa, Syrdarııa, Jetisý, Altaı–Tarbaǵataı jáne Batys Qazaqstan mektepteri keńinen tanystyrylady. Kórermender osy óńirlerge tán ánder, jyrlar men kúılerdi tyńdap, ár mekteptiń oryndaýshylyq erekshelikterimen tanysady.

Mádenı keshke elimizdiń belgili óner qaıratkerleri men dástúrli óner ókilderi qatysady. Sondaı-aq sahnada «Qorqyt» ansambli, «Shalqyma» bı ansambli, «Dala Sound» kvarteti jáne E. Rahmadıev atyndaǵy Memlekettik akademııalyq fılarmonııanyń hory óner kórsetedi.

Sol kúni elordalyq amfıteatrda turǵyndar men qala qonaqtaryna jańa formattaǵy mýltımedııalyq shoý usynylady. Saǵat 12:00–den 20:00–ge deıin munda balalarǵa arnalǵan mádenı-oıyn-saýyq baǵdarlamasy uıymdastyrylyp, túrli taqyryptyq alańdarda sheberlik sabaqtary, shyǵarmashylyq belsendilikter men ınteraktıvti oıyndar ótedi.

Al saǵat 20:00–de amfıteatrda merekelik kontserttik baǵdarlama bastalady.