Ulttyq dombyra kúni: Astanada 10 myń oqýshy chellendj joldady
ASTANA. KAZINFORM — Elimizde shilde aıynyń alǵashqy jeksenbisinde atalyp ótetin Ulttyq dombyra kúnine oraı Astana qalasynda aýqymdy respýblıkalyq chellendj bastaý aldy, dep habarlaıdy elorda ákimdiginiń resmı saıty.
Astana qalasy Bilim basqarmasynyń Ádistemelik ortalyǵynyń uıymdastyrýymen ótken «Naǵyz qazaq — qazaq emes, naǵyz qazaq — dombyra!» atty respýblıkalyq chellendjge mýzyka páni muǵalimderi men oqýshylar belsendi qatysyp, ulttyq ónerdi ulyqtaýǵa óz úlesterin qosty.
Elorda boıynsha chellendjge 10 myńǵa jýyq oqýshy qatysty. Olar mýzyka páni muǵalimderiniń jetekshiligimen Astananyń kórikti oryndarynda, mádenı nysandarynda jáne qoǵamdyq keńistikterinde kúı oryndady. Bastamanyń negizgi maqsaty — oqýshylardyń ónerin kópshilikke tanystyrý, bir-biriniń oryndaýyn qoldaý jáne elimizdiń ózge óńirlerindegi qurdastaryn respýblıkalyq chellendjge qosylýǵa shaqyrý. Osylaısha, elordalyq oqýshylar ulttyq ónerdi ulyqtaı otyryp, dombyranyń únin búkil respýblıkaǵa nasıhattaıtyn mádenı estafetany bastady.
Chellendjdi alǵashqylardyń biri bolyp Almaty, Shymkent qalalarynyń, Túrkistan men Batys Qazaqstan oblystarynyń bilim berý uıymdary qabyldap, ulttyq ónerdi nasıhattaý isine belsendi atsalysty. Dombyranyń kúmbirlegen úni arqyly qatysýshylar halqymyzdyń baı mádenı murasyn dáriptep, ulttyq qundylyqtardy keńinen nasıhattady.
Bul bastama ulttyq ónerdiń urpaqtan urpaqqa jalǵasýyna, jastardyń dombyraǵa degen qyzyǵýshylyǵynyń artýyna jáne tól mádenıetimizdiń keńinen dáriptelýine zor serpin berip otyr. Ásirese, bilim berý uıymdarynyń ustazdary men oqýshylarynyń belsendiligi ulttyq tárbıeni nyǵaıtyp, óskeleń urpaqtyń boıynda otansúıgishtik pen rýhanı qundylyqtarǵa degen qurmetti qalyptastyrýǵa yqpal etpek.
