Ulttyq dástúr jańǵyrtyldy: Pavlodarda qymyzmuryndyq toılandy
PAVLODAR. KAZINFORM — Aqsý qalasynyń mádenıet jáne demalys saıabaǵynda ejelgi qazaq saltyna negizdelgen qymyzmuryndyq merekesi keńinen atap ótildi.
Merekeniń shymyldyǵyn qazaqtyń ulttyq «Qosbasar» bıimen «Aıgólek» úlgili bı ansambli ashty. Keıin S. Dónentaev atyndaǵy mádenıet saraıynyń uıymdastyrýymen jergilikti ónerpazdar men «Asyl mura-Aqsý» qoǵamdyq birlestigi, «Qazaq analary — dástúrge jol» respýblıkalyq qoǵamdyq birlestiginiń ájeleri teatrandyrylǵan qymyzmuryndyqtyń kórinisin kórsetti.
Merekege Aqsý qalasyna qarasty alty aýyldyq okrýginiń belsendi, sheber, ónerpaz turǵyndary atsalysyp, qonaqtarǵa qazaq salt-dástúriniń atmosferasyn syılady.
— Ár aýyl 20 lıtr qymyz ben baýyrsaqtar ákeldi. Qala tarapynan 40 lıtr qymyz daıyndalyp, 30 keli baýyrsaq pisirildi. Paıdaly ári emdik qasıeti bar sýsyn men ystyq baýyrsaqtar turǵyndarǵa taratyldy. Biraq eń basty maqsat — qaryn toıdyrý emes, jańǵyrtylǵan dástúrdi kórsetý boldy, — deıdi Aqsý qalasynyń mádenıet jáne tilderdi damytý bóliminiń basshysy Medǵat Manapov.
Bıe sútiniń adam aǵzasyna asa paıdaly ekeni málim. Dárýmenge baı qymyzdyń ázirlený joldary da ártúrli. Ásirese Arqanyń bal tatyǵan qymyzyn ystyqta shólińdi qandyryp ishkenge ne jetsin! Bir qyzyǵy búginde Ertis-Baıan óńirin meken etken ártúrli ult ókilderi úshin qymyz dostyq sýsynyna aınalǵandaı. Onyń qasıetin, paıdasyn ózgeler joǵary baǵalaıdy. Jazdyń alǵashqy kúnderinde ótetin «Qymyzmuryndyqty» asyǵa kútip, arqa-jarqa bolyp qalatyny da sodan.
— Qymyzmuryndyq degenimiz — mamyrdyń aıaǵy — maýsymnyń bas jaǵynda jasyl shóp ósip kele jatqanda bıelerdi baılap, alǵashqy qymyz ishýdiń rásimi. Saýmal — densaýlyqqa eń qajetti, kerek sýsyn. Qymyzdyń túr-túri bar. Aşy qymyz dep 4-5 kún turyp qalǵan qymyzdy aıtady. Al bal qymyzǵa tátti zattar qosady, — deıdi «Qazaq analary — dástúrge jol» respýblıkalyq qoǵamdyq birlestiginiń Aqsýdaǵy tóraǵasy Shámshııa Qusaıynova.
Buǵan deıin Qazaqstanda qymyz ben shubat baǵasy qansha turatyn jazǵanbyz