Almatyda mektep janyndaǵy lagerler jumysyn bastaıdy
ALMATY. KAZINFORM — Oqý jyly aıaqtalǵannan keıin Almatyda mektep janyndaǵy lagerler jumysyn bastaıdy.
Qazir megapolıstegi 200-den astam mektep lager ashýǵa belsendi daıyndyq júrgizip jatyr. Ata-analar balasyn lagerge mektep ákimshiligine júginý arqyly tirkeı alady. Oqýshylar tegin demalady.
Almaty qalasy bilim basqarmasynyń basshysy Saıran Saıfedenovtyń sózinshe, balalar úshin mazmundy jazǵy demalys baǵdarlamasy ázirlenip jatyr. Lagerlerde balalar zııatkerlik jáne shyǵarmashylyq oıyndarǵa, sporttyq jarystarǵa, vıktorınalarǵa, pikirsaıys klýbtaryna, jazǵy til mektepteri men «Jas ulan», «Jas qyran» baǵdarlamalary boıynsha sabaqtarǵa qatysa alady.
— Ár mektep jazǵy baǵdarlamasyn ázirleıdi. Mysaly, alty mektep janynan ulttyq dástúrmen jaqyn tanysýǵa, sándik-qoldanbaly óner men qolóner negizderin úırenýge múmkindik beretin kıiz úıdegi etnolager uıymdastyrylady. 24 mektepte fýtbol, voleıbol, basketbol jáne ulttyq sport túrleri boıynsha jarystar ótedi. 50 mektepte oqýshylardyń ekologııalyq mádenıetin jáne tabıǵatqa sanaly kózqarasyn damytýǵa baǵyttalǵan ekologııalyq lager jumys isteıdi. Jalpy, 200-den astam mektep bazasynda jazǵy mektep janyndaǵy lager uıymdastyrylady. Ata-analar lagerge barý úshin aqy tólemeıdi, — dedi Almaty qalasy Bilim basqarmasynyń basshysy Saıran Saıfedenov.
Saıran Saıfedenov balalardyń qaýipsizdigi máselesine erekshe kóńil bólinetinin de atap ótti. Barlyq lager medıtsınalyq kabınettermen jabdyqtalady. Mektep dırektorlarymen sanıtarlyq-epıdemıologııalyq baqylaý basqarmasy jáne Tótenshe jaǵdaılar departamenti ókilderiniń qatysýymen jınalystar ótkizildi. Sonymen qatar, balalar úshin sý aıdynynda, jolda, saıabaqta jáne qoǵamdyq orynda ózin ustaý erejeleri boıynsha aldyn alý sabaqtary uıymdastyrylady.
Buǵan qosa, jaz mezgilinde qalada kóshpeli jáne beıindi lager de uıymdastyrylady. «Shabyt» jáne «Samǵaý» ortalyqtary, № 1 Oqýshylar úıi jáne eki ınnovatsııalyq shyǵarmashylyq ortalyǵy sekildi bes qosymsha bilim berý mekemesiniń bazasynda ǵylymǵa, eksperımentterge jáne jobalyq qyzmetke baǵyttalǵan IT-lager jumysyn bastaıdy. Oqýshylar saraıy jáne basqa mekemeler janyndaǵy kúndizgi lagerde shahmat, vokal, bı, kúres jáne basqa da baǵyttar boıynsha sabaqtar ótkiziledi.
Jazǵy lagerlerden bólek, jaz boıy balalarǵa qosymsha bilim beretin uıymdar da jumys isteıdi. Memlekettik bilim berý tapsyrysy aıasynda 11 myńǵa jýyq oqýshy 122 jeke menshik bilim berý uıymynda sabaqqa tegin qatysady.
Sondaı-aq, qalalyq kolledjder bazasynda kásiptik baǵdar berý baǵytyndaǵy sektsııalar uıymdastyrylady. «Jaz — bolashaq mamandyqpen» jobasy aıasynda oqýshylar 17 kolledj bazasynda aspazdyq, kıim dızaıny, shashtaraz isi jáne basqa da mamandyq boıynsha ózin synap kóre alady.
Buǵan deıin Oqý-aǵartý mınıstrligi jazǵy demalys kezinde oqýshylarǵa qandaı jeńildikter qarastyrylǵanyn túsindirgen edi.