Ulttyq damý ınstıtýty statýsyndaǵy «Otbasy bank» páter bólýdi Aqmola oblysynan bastady
ASTANA.KAZINFORM - Jańa páter kiltin alǵan baqytty jandar qatarynda kópbalaly otbasylar, jetim balalar, múgedektigi bar jandar, múmkindigi shekteýli bala tárbıelep otyrǵan otbasylar bar.
Kókshetaý qalasyndaǵy «Saryarqa» yqshamaýdanynda uzaq jyldar boıy baspana kezeginde turǵan óńir turǵyndaryna 21 páterdiń kilti saltanatty túrde tabys etildi. «Otbasy bank» ulttyq damý ınstıtýty retinde jańa páterler taratty. Bul Aqmola oblysy ákimdigi men bank arasyndaǵy birlesken pılottyq joba. Munda avtomattandyrylǵan júıe mehanızmi qoldanylyp, ol óziniń tıimdiligin dáleldedi. Jaqyn arada «Otbasy bank» elimizdiń basqa aımaqtarynda jalǵa beriletin jáne ıpotekalyq turǵyn úılerdi bólýdi bastaıdy.
Jańa páter ıelerin Aqmola oblysy ákiminiń orynbasary Altynaı Ámirenova men «Otbasy bankiniń» Aqmola oblystyq fılıalynyń dırektory Almat Nurahmetov quttyqtady.
-Turǵyn úı berýdiń ereksheligi - bári avtomatty rejımde júrgizildi. Eshqandaı komıssııa, eshqandaı adamı faktor bolǵan joq. Bul úshin orasan zor jumys atqaryldy. Bank qyzmeti ondaǵan memlekettik derekter bazasymen biriktirilgen. Kezekte turǵandar páter alýǵa ótinish berdi, júıe turǵyn úı kezegine erterek qosylǵan jáne sol jerde belgili bir basymdyq sanatyna sáıkes keletin páterlerdiń tizimin jasady. Alǵashqy páterler 21 otbasy arasynda úlestirildi, endi kezekte 47 otbasy tur, sodan keıin taǵy 55 páterdi úlestiremiz, - dedi Almat Nurahmetov.
Jańa páterge ıe bolǵan baqytty jandar qatarynda Samal Itqulova da bar. Eki balasy bar kelinshek 11 jyl boıy óz baspanasy bolǵanyn armandap, jaldamaly páterde ómir súrdi. Osy ýaqyt boıy ol kúnderdiń kúni óz kezegi keletinine senbedi.
- Búgin men qýanyshtan kóz jasymdy tyıa almaı turmyn. Halyqtyń qoljetimdi sharttarmen páter alý múmkindiginiń bolǵany qandaı jaqsy. Qazirgi tańda ıpotekaǵa páter alý ońaı emes, paıyzdyq mólsherleme óte joǵary. Biraq, «Otbasy bank» pen memleketimizdiń qoldaýynyń arqasynda tómen paıyzben baspana alýǵa múmkindigimiz bar. Páter jobasyn ózim tańdadym. Endi óz baspanamyz bar, balalarymnyń qýanyshynda shek joq, - degen páter ıesi qýanyshyn jasyra almady.
Kezekte turǵandarǵa baspanany Aqmola oblysynyń ákimdigi úlestirdi. Otbasy bankke barlyǵy 68 páter sharshy metrine 261 850 teńgeden berildi. Oblys turǵyndary páterdiń sharshy metrin jyldyq 2% (2%-dan 2,1%-ǵa deıin) jáne 5%-dyq(5,2%-dan 5,8%-ǵa deıin) jeńildetilgen mólsherlememen, nebári 10% bastapqy jarnamen satyp aldy.
Bes balanyń anasy Zaıra Áýbákirova aýyldan Kókshetaýǵa qonys aýdaryp, birden «Otbasy bank» arqyly baıqaýǵa qatysýǵa bel baılaǵan jáne páterine qol jetkizdi.
- Munda alǵash kóship kelgenimde óte qıyn boldy. Turǵylyqty mekenjaıymyz bolmaǵandyqtan eshkim baspana kezegine almady. Jataqhanaǵa tirkelýimizge týra keldi. Bir bólmeni 100 myń teńgege jalǵa aldyq. Endi biz nebári 2% mólsherlememen jeńildetilgen nesıe tóleıtin bolamyz (jyldyq paıyzdyq mólsherleme 2%-dyquraıdy). Únemi bir páterden ekinshi páterge kóship, eki ese kóp tólegennen góri bul bizge áldeqaıda yńǵaıly. Páterdiń kiltin alǵanymda, qatty tolqydym. Bizdiń páterimiz 5-qabattaǵy eki bólmeli páter, óte jyly. Birneshe kúnnen keıin kóship kelýdi josparlap otyrmyz, sodan keıin ornalasyp, jaqyn jerden mektep tabamyz, - dedi Zaıra.
«Otbasy bank» qyzmetkerleriniń aıtýynsha, Aqmola oblysynda kezekte turǵandar arasynda turǵyn úı taratý - Otbasy banki «Turǵyn úımen qamtý ortalyǵynyń» pılottyq jobasy. Osy joba aıasynda «Otbasy bank» 2025 jyldyń 13 tamyzynan bastap sýbsıdııalanatyn áleýmettik turǵyn úı alýǵa kezekte turǵandardyń ótinishterin qabyldaýdy bastady. Júıe turǵyn úıge kezekke turý kúni men kiris deńgeıin eskere otyryp, avtomatty túrde páterlerdi bóldi.
Sharshy metrler birinshi kezekte turǵan azamattardyń basym sanattary arasynda bólindi: UOS ardagerleri men solarǵa teńestirilgen azamattar, jetim jáne ata-anasynyń qamqorlyǵynsyz qalǵan balalar, kópbalaly otbasylar, I jáne II toptaǵy múgedekter, múmkindigi shekteýli bala tárbıelep otyrǵan otbasylar jáne jesirler. Bul tulǵalar turǵyn úımen qamtamasyz etýdiń jalpy kóleminiń 70%-yn qurady. Onyń 20%-y jetim balalarǵa úlestirildi. Qalǵan 30%-y kezekte turǵandardyń basqa sanattary arasynda bólindi.
Jaqyn arada «Otbasy bank» elimizdiń basqa aımaqtarynda jalǵa beriletin jáne ıpotekalyqturǵyn úı taratýdy bastaıdy. Bul úı kezeginde turǵandardy ilgeriletip, muqtaj jandarǵa baspana alýǵa kómektesedi.