Ulttyq bıometrııalyq sáıkestendirý júıesine qosylý jáne jumys isteý erejeleri ázirlenedi
ASTANA. KAZINFORM — Ulttyq bıometrııalyq sáıkestendirý júıesine qosylý jáne jumys isteý erejeleri ázirlenedi. Bul týraly Májilis depýtattarynyń saýalyna Premer-mınıstrdiń orynbasary — Jasandy ıntellekt jáne tsıfrlyq damý mınıstri Jaslan Mádıevtiń jaýabynda aıtylǵan.
— Tsıfrlyq kodeks jobasyna sáıkes bıometrııalyq sáıkestendirý Ulttyq bıometrııalyq sáıkestendirý júıesin, ókiletti organ bekitken onyń jumys isteý jáne qosylý erejelerin qoldana otyryp júzege asyrylady. Buǵan qosa, Tsıfrlyq kodeks jobasy aıasynda Ulttyq bıometrııalyq sáıkestendirý júıesine qosylý jáne jumys isteý erejelerin ázirleý josparlanǵan. Onyń aıasynda bıometrııalyq derekterdi jınaý, saqtaý jáne joıý algorıtmderi eskeriledi, — dedi.
Onyń aıtýynsha, búginde elimizde tekserýler júrgizýge jáne ákimshilik jaýapkershilik sharalaryn qoldanýǵa múmkindik beretin tetik jumys isteıdi.
— Munan bólek, Jasandy ıntellekt jáne tsıfrlyq damý mınıstrligi jeke jáne zańdy tulǵalardyń derbes derekteri men olardyń qorǵalýyna qatysty ótinishterin, Ákimshilik quqyq buzýshylyq kodeksiniń 79-babynda kózdelgen ákimshilik quqyq buzýshylyqtar týraly isterdi qaraýǵa, sondaı-aq jospardan tys tekserýler júrgizýge ýákiletti. Bul rette derbes derekterdi qorǵaý salasyndaǵy zańnama talaptaryn buzǵany úshin 30-dan 2 000 AEK-ke deıingi mólsherde ákimshilik jaýapkershilik kózdelgen, — dedi Jaslan Mádıev.
Buǵan deıin «Azamattarǵa arnalǵan úkimettiń» mamandandyrylǵan ortalyqtarynda avtokólik ıeleri men emtıhan tapsyrýshylarǵa memlekettik qyzmet kórsetý úshin bıometrııalyq sáıkestendirý tehnologııasy engizilgen edi.