Túrkistanda 13 kárizdik tazalaý qondyrǵysynyń 9-y ekologııalyq qaýip tóndirip tur
TÚRKІSTAN. KAZINFORM — Túrkistan oblysynda qatty turmystyq qaldyq tastaıtyn polıgondardyń órtenýi, jylyjaılardaǵy kómir paıdalaný jáne kárizdik tazalaý qondyrǵylarynyń tozýy óńirdegi ekologııalyq jaǵdaıdy alańdatyp otyr.
Oblystyq ekologııa departamentiniń basshysy Qadirhan Beısenbaevtyń aıtýynsha, qazirgi tańda óńirde barlyǵy 13 kárizdik tazalaý qondyrǵysy bar. Onyń tek tórteýi — Arys qalasy men Jetisaı, Maqtaaral jáne Sozaq aýdandaryndaǵy nysandar ekologııalyq talaptarǵa saı keledi.
— Al Túrkistan qalasy, Saıram, Tólebı, Túlkibas, Shardara jáne Saryaǵash aýdandaryndaǵy qondyrǵylardyń tehnıkalyq tozýyna baılanysty tazalaý tıimdiligi tómen. Kentaý qalasy men Saryaǵash aýdanynyń Kókterek kentinde kárizdik tazalaý qondyrǵylarynyń múlde bolmaýy saldarynan tazartylmaǵan aǵyn sýlar qorshaǵan ortaǵa tógilip, ekologııalyq ári sanıtarlyq qaýip tóndirip otyr, — dedi spıker.
Budan bólek, óńirde qatty turmystyq qaldyq tastaıtyn polıgondardyń jıi órtenýi ekologııalyq qaýiptiń artýyna sebep bolyp otyr. Ótken jyly oblysta osyndaı 17 derek tirkelgen.
— Reıdtik is-sharalar barysynda jeke jáne zańdy tulǵalarǵa qatysty 17 ákimshilik is qozǵalyp, jalpy somasy 9,3 mln teńge kóleminde aıyppul salyndy. «Qazaqstan Ǵarysh sapary» AQ-men birlesip júrgizilgen ǵaryshtyq monıtorıng nátıjesinde óńirde 249 zańsyz qoqys orny anyqtalyp, tolyqtaı tazartyldy, — dedi ol.
Sonymen qatar Saryaǵash aýdanynda jylyjaı sharýashylyqtarynyń tyǵyz ornalasýy jáne kómir otynyn paıdalanýy, ásirese qys mezgilinde, atmosferalyq aýanyń lastanýyna ákelip otyr. Sonyń saldarynan turǵyndar tarapynan tútin men jaǵymsyz ıiske qatysty shaǵymdar jıilegen.
Departament málimetinshe, ótken jyly oblysta 80-nen astam baqylaý sharalary júrgizilgen. Nátıjesinde 177 ekologııalyq zań buzý anyqtalyp, olardy joıý úshin 173 nusqama berilgen, onyń 124-i oryndalǵan.
Anyqtalǵan zań buzý boıynsha 824 ákimshilik is qozǵalyp, 92,5 mln teńge kóleminde aıyppul salynǵan. Onyń 79,3 mln teńgesi óndirilse, 11,7 mln teńgesi májbúrlep óndirýge joldanǵan.
Sondaı-aq byltyr keń taralǵan paıdaly qazbalardy zańsyz óndirýdiń 423 deregi anyqtalǵan. Sonyń ishinde 325 jeke tulǵaǵa qatysty 7,7 mln teńge kóleminde aıyppul salynǵan. Qujattarynyń tolyq bolmaýyna baılanysty 102 is jáne daıyn ónimge qatysty 23 is keri qaıtarylǵan.
Budan buryn Túrkistan oblysynda turmystyq qaldyq tastaıtyn polıgondar talapqa saı emes ekenin jazǵan edik.