Ulttyq banktiń tólem júıeleri arqyly 9 aıda kvadrıllıon teńge óńdeldi
ASTANA. KAZINFORM — Jyl basynan beri Ulttyq banktiń bankaralyq tólem júıeleri 1 kvadrıllıon teńge qarajat óńdedi. Bul — eldegi barlyq qolma-qol aqshasyz aınalymnyń shamamen 88%-y. Ol jaıynda QUB Tóraǵasynyń orynbasary Aqyljan Baımaǵambetov Central Asia Fintech Summit-tiń ashylýynda aıtty.
Keıingi 5 jylda Qazaqstanda halyq arasynda qolma-qol aqshasyz tranzaktsııa kólemi 10 ese ósip, onyń bólshek saýda aınalymyndaǵy úlesi 89%-ǵa jetken.
«Klıenttiń «onbordıngi», bank shotyn ashý, nesıe rásimdeý, aqsha tóleý men aýdarý, sondaı-aq memlekettik qyzmetter sııaqty negizgi qarjy qyzmetiniń barlyǵyna tsıfrlyq formatta, qashyqtan qol jetkize alamyz. Ulttyq bank bazasynda bıometrııalyq sáıkestendirý servısi sátti jumys istep tur, onyń kómegimen aıyna 2,5 mln-nan astam ótinish óńdeledi», — dedi Aqyljan Baımaǵambetov.
Sondaı-aq Tóraǵa orynbasary Ulttyq banktiń bankaralyq tólem júıeleri eldegi barlyq qolma-qol aqshasyz aınalymnyń shamamen 88%-yn óńdeıtinin, al bıylǵy 9 aıda tranzaktsııa aınalymynyń jalpy kólemi 1 kvadrıllıon teńgeden asyp túskenin jetkizdi.
Degenmen, ınnovatsııalardyń ómirimizge tez enýimen qatar kıberqaýip pen onlaın-alaıaqtyq ta kúsheıip keledi. Aqyljan Baımaǵambetovtiń aıtýynsha, bıyl iske qosylǵan Antıfrod-ortalyq qazirdiń ózinde 500 mln teńgeden astam somany alaıaqtardyń ıemdenip ketýinen saqtap qaldy.
«Bul bastama qarjy qyzmetteriniń tsıfrlyq formatqa sátti kóshkenin bildiredi dep senimdi túrde aıtýǵa bolady. Bizdiń mindetimiz — osy baǵytta odan ári damyp, aımaqta kóshbasshy pozıtsııasyn saqtap qalý», — dedi ol.
