Ulttyq banktiń retteýshilik «qumsalǵyshynda» 30-dan astam krıptojoba synaqtan ótip jatyr
ASTANA. KAZINFORM – Bul týraly Ulttyq banktiń Tólem júıeleri jáne tsıfrlyq qarjy tehnologııalary departamenti Innovatsııalar jáne tsıfrlyq aktıvter basqarmasynyń bas mamany Madııar Qyzaıbekov «Qazaqstan Respýblıkasyndaǵy krıptoındýstrııany damytý jáne ony retteý erekshelikteri» atty jabyq dóńgelek ústelde aıtty.
– Qazirgi tańda Qazaqstan Ulttyq bankiniń retteýshilik «qumsalǵyshynda» 33-ten astam joba synaqtan ótip jatyr. Olardyń qatarynda krıptotólemder, steıblkoın shyǵarý, jyljymaıtyn múlik pen baǵaly metaldardy tokenızatsııalaý sııaqty baǵyttar bar. Sondaı-aq joba aıasynda krıptobrokerlik qyzmetter, kastodıandyq qyzmetter, tsıfrlyq aktıvter platformalary da testiden ótip jatyr - dedi spıker.
Ulttyq bank ókiliniń aıtýynsha, bul alań jańa qarjy ónimderin zańnamalyq ózgerister engizilgenge deıin synaqtan ótkizýge múmkindik beredi.
– «Qumsalǵysh» qatysýshylary óz bıznes-modelderiniń qanshalyqty ómirsheń ári turaqty ekenin túsinedi. Testileýden keıin olardyń kóbi tolyqqandy lıtsenzııa alýǵa umtylady, – dedi Madııar Qyzaıbekov.
Onyń sózinshe, bul jobalarǵa tek fınteh-kompanııalar ǵana emes, sonymen qatar dástúrli qarjy uıymdary da qatysyp otyr. Atap aıtqanda, ekinshi deńgeıli 10-nan astam bank, tsıfrlyq qarjy platformalary jáne halyqaralyq kompanııalar seriktes retinde tartylǵan.
Ulttyq bank sarapshylarynyń pikirinshe, tsıfrlyq aktıvter naryǵynyń damýy ınvestıtsııa tartý múmkindigin keńeıtip, jańa qarjy quraldarynyń paıda bolýyna jol ashady. Sonymen qatar tokenızatsııa arqyly jyljymaıtyn múlik, altyn, baǵaly qaǵazdar jáne ózge de aktıvterdi tsıfrlyq formatta aınalymǵa engizý múmkin bolady.
Buǵan deıin Májilis depýtaty Azat Perýashev Qazaqstanda tsıfrlyq aktıvter naryǵyn damytý qarqynyn arttyrý qajettigin atap ótken edi.
