Ulttyq banktiń retteýshi synaq alańynyń maqsaty ne

ASTANA. KAZINFORM – Steıblkoın teńgemen 100 paıyz birge-bir qamtamasyz etiledi. Bul týraly Kazinform agenttiginiń BIZDIÑ ORTA podkastynda Ulttyq banktiń ınnovatsııalar boıynsha sarapshysy Baqyt Smekenov aıtty. 

– Steıblkoınniń qoldaný aıasy keń. Kommertsııalyq bank rólin qarastyratyn bolsaq, birinshiden, steıblkoın teńgemen qamtamasyz etiledi jáne sol teńge banktiń oqshaýlanǵan shotynda ornalastyrylyp, saqtalady. Ekinshiden, kommertsııalyq banktiń tólem kartalarymen steıblkoındy qoldanýǵa bolady. Ulttyq banktiń retteýshi synaq alańyna keler bolsaq, ol oqshaýlanǵan shekteýli ortada jańa qarjylyq, krıptofıattyq servısti synaqtan ótkizý alańy sanalady. Bul retteýshi synaq alańynyń maqsaty – jańa krıptofıattyq servısti keńinen engizbesten buryn onyń táýekelderin baqylap, anyqtaý. Sodan keıin sol táýekelderdi tómendetý erejelerin jasap, keńinen qoldanysqa engizý, - dedi ol.

Onyń aıtýynsha, maýsymda Ulttyq bank pen Qarjy naryǵyn retteý agenttigi ekinshi deńgeıli bankterge krıptokarta shyǵarýǵa ruqsat bergen.

– Krıptokarta tek qana bank ónimi emes. Ol birneshe seriktesterdiń jalpy ózara áreket etýiniń arqasynda shyǵarylady. Ony shyǵarýǵa krıptobırja da, bank te qatysady. Krıptokartamen tólem jasaǵan kezde steıblkoın lezde teńgege konvertatsııalanyp, teńge túrinde kásipkerge túsedi. Bul birneshe sekýnda iske asatyn tetik sanalady. Steıblkoınnyń artyqshylyǵy ol teńgemen 100 paıyz birge-bir qamtamasyz etiledi. Sondyqtan baǵalyq aýytqýy táýekeli tómen, - dedi Baqyt Smekenov. 

Buǵan deıin elimizde teńgege baılanǵan alǵashqy steıblkoın iske qosylǵanyn jazǵan edik.