Ulttyq banktiń retteýshi synaq alańynda jyljymaıtyn múlikti tokendeý jobasy iske qosyldy
ASTANA. KAZINFORM - Ulttyq bank tsıfrlyq aktıvter boıynsha banktiń retteýshi synaq alańy aıasynda kommertsııalyq jyljymaıtyn múlikti tokendeý boıynsha pılottyq joba iske qosylǵanyn habarlady.
Tokendi retteýshi synaq alańyna qatysýshy – Apartchain platformasyndaǵy «Balamaly sandyq jeliler» kompanııasy Nazarbayev University Impact Foundation, Astana Business Campus, First Validator seriktesterimen birlesip iske qosty.
Joba kommertsııalyq jyljymaıtyn múlikpen qamtamasyz etilgen tsıfrlyq tokenderdi shyǵarý isin qarastyrady. Munda bir token nysannyń bir sharshy metrine sáıkes keledi. Osylaısha, jyljymaıtyn múlik tsıfrlyq úles túrinde usynylǵan, olarmen blokcheın tehnologııasyn paıdalana otyryp, mamandandyrylǵan platformada operatsııalar júrgizýge bolady.
Pılottyq joba aıasynda ınvestorlar kommertsııalyq jyljymaıtyn múliktegi úleske quqyq beretin tokenderdi satyp ala alady, operatsııalar jasap, tabysty bólýge (ıeligindegi tokender kólemine proportsıonaldy túrde) qatysa alady. Blokcheın tehnologııasy quqyqtardyń ashyq esebin jáne operatsııalar tarıhynyń saqtalýyn qamtamasyz etedi.
Pılottyq joba tehnologııalyq jáne operatsııalyq aspektilerge monıtorıng júrgizýmen, sondaı-aq táýekelder men quqyq qoldaný praktıkasyn baǵalaýmen birge shekteýli retteýish kontýrda (retteýshi synaq alańynda) júzege asyrylady. Bul quraldy keıin Qazaqstan naryǵyna engizý úshin tsıfrlyq qarjy aktıvter (tokender) arqyly jyljymaıtyn múlik operatsııalaryna qatysýdyń túsinikti ári qoljetimdi mehanızmin qalyptastyrýǵa kómektesedi.
Osyǵan deıin bıyl tsıfrlyq teńge qaı salalardyń bıýdjetine engiziletini týraly jazdyq.
