Ulttyq banktiń negizgi paıyzdyq stavkasyna qatysty máseleni paıymdap sheshý kerek — Prezıdent
ASTANA. KAZINFORM — Búgin Parlament palatalarynyń birlesken otyrysynda Memleket basshysy Qasym-Jomart Toqaev Qazaqstan ekonomıkasyn jańa úlgige kóshirýge qatysty pikir aıtty.
— Bul — asa mańyzdy strategııalyq mindet. Oǵan jedel túrde qol jetkizý úshin jańa kózqaras, jańa ustanym qajet. Burynǵy jumys tásilderi men ádisteri tıimdi bolmaıtyny anyq. Buǵan deıin de aıttym: jahandaǵy jaǵdaı, jalpy halyqaralyq ahýal jyl ótken saıyn ýshyǵyp barady. Túrli qaqtyǵystar men syn-qaterler az emes. Biraq biz soǵan qaramastan, salıqaly saıasat júrgizip, nyq senimmen alǵa qadam basyp kelemiz. Biz bul saıasatty berik ustanýymyz qajet, — dedi Qasym-Jomart Toqaev.
Osy oraıda Prezıdent byltyr ekonomıkamyz 6,5 paıyzǵa óskenin eske saldy. Muny álem elderiniń damý qarqynymen salystyrǵanda joǵary kórsetkish deýge bolady.
— Jalpy ishki ónim el tarıhynda alǵash ret 300 mıllıard dollardan asty. Onyń jan basyna shaqqandaǵy úlesi 15 myń dollardan asyp, 2019 jyldan beri bir jarym ese artty. Bul — Táýelsiz memleketter dostastyǵy elderi arasyndaǵy eń joǵary nátıjeniń biri. Inflıatsııa baǵamy tómendedi: bıylǵy bes aıdyń qorytyndysy boıynsha onyń deńgeıi 10,4 paıyzǵa deıin tústi. Biraq bul kórsetkishti áli de tómendetý kerek. Qazaqstannyń qarjy júıesi turaqty. Ulttyq valıýtamyz da óz tuǵyrynda nyq tur, syrtqy qaýip-qaterlerden senimdi túrde qorǵalǵan dep aıtsaq, qate bolmaıdy. Jalpy, Parlament Úkimetpen jáne Ulttyq bankpen birlesip, tıimdi jumys atqardy. Qazirgi tańdaǵy eń ózekti másele — Ulttyq banktiń negizgi paıyzdyq stavkasy. Bul máseleni paıymdap sheshý kerek. Ózderińiz qabyldaǵan Bıýdjet jáne Salyq kodeksterine sáıkes elimizdiń ekonomıkalyq júıesi tolyǵymen qaıta jańǵyrdy jáne memleket qarjysyn basqarýǵa qatysty ustanym túbegeıli ózgerdi. Osylaısha, Qazaqstan ekonomıkasynyń jańa kelbetine jol ashýǵa qajetti negiz qalyptasty, — dedi Memleket basshysy.
Buǵan deıin habarlanǵandaı, búgin elordada Parlament palatalarynyń birlesken otyrysynda Prezıdent Qasym-Jomart Toqaev Quryltaıdyń aldynda qandaı mindet turǵanyn atady.
