Ulttyq banktiń ınflıatsııa boıynsha boljamy qandaı
ALMATY. KAZINFORM – QR Ulttyq Bankiniń tóraǵasy Tımýr Súleımenov josparlanǵan salyq jáne bıýdjet reformalary ınflıatsııany tómendetýge yqpal etetinin aıtty.
Onyń sózinshe, bıýdjet tapshylyǵy 2,5%-dan 0,9%-ǵa deıin tómendeıdi. Al Qazaqstan Ulttyq qorynan bólinetin transfertter 5,2 trln teńgeden 2,8 trln teńgege qysqartylady.
– Munyń bári durys jáne eseptelgen fıskaldyq saıasat. Eń mańyzdysy – onyń is júzinde oryndalýy. ıAǵnı zań jáne tártip bolýy kerek. Sondyqtan biz jalpy makroekonomıkalyq parametrler sheńberinde ózgerister men túzetýler bolmaǵanyn kútemiz, - dedi ol.
Sonymen qatar Ulttyq bank basshysy salyq-bıýdjet saıasatyn qatańdatý men baıypty aqsha-kredıt saıasaty ekonomıkanyń keıbir salalarynyń ósimin ýaqytsha baıaýlatýy múmkin ekenin aıtty.
– Ádette gaz ben tejegish qatar turady. Biraq bul ekeýin de gaz tetigi deýge bolady. Eger tym qatty «gaz berip», aqsha-kredıt jáne fıskaldyq saıasatty bir ýaqytta jumsartsań, ınflıatsııa bolady. Qysqa merzimde belgili bir ósimdi kóresiń, biraq keıin ınflıatsııa, kúrt tómendeý, qulaý bolady, - dedi Tımýr Súleımenov.
Onyń aıtýynsha, salyq-bıýdjet saıasatyn qatańdatý aıasynda tarıftik sharalar kezeń-kezeńimen jáne baqylaýmen engiziledi. Osy keshendi sharalar jıyntyǵy ınflıatsııany tómendetýge kómektesedi.
– Orta jáne uzaq merzimde aqsha-kredıt saıasaty beıtarap bolýy tıis. Ol ósimdi qoldaı nemese tejeı almaıdy. Ol ekonomıkanyń ishki organıkalyq ósim qarqyny men teńgerimdi makroekonomıkalyq jaǵdaıdy saqtaý qajettiligine súıene otyryp, turaqty makroorta qalyptastyrýy tıis. Sondyqtan biz osy qaǵıdatty ustanamyz, - dedi Ulttyq Banktiń tóraǵasy.
Eske salaıyq, ótken aıda Ulttyq bank bazalyq mólsherlemeni 18%-ǵa deıin kóterdi.
Keshe Ulttyq bank tóraǵasy Bazalyq mólsherleme boıynsha sheshim qabyldaýǵa JI kómektesýi múmkin ekenin aıtty.