Ulttyq banktiń atyn jamylǵan alaıaqtar 9 mln teńgeni ıemdengen
ASTANA. KAZINFORM — Qazaqstanda alaıaqtar Ulttyq banktiń qyzmetkerleri retinde tanysyp, azamattardyń aqshasyn «qaýipsizdendirý» syltaýymen ıemdenip júr. Keıingi bir jarym aıda el boıynsha osyndaı 39 derek tirkelgen.
Bas prokýratýranyń málimetinshe, alaıaqtar azamattarǵa telefon shalyp, ózderin Ulttyq banktiń qyzmetkerleri retinde tanystyrady. Olar adamnyń derbes derekteri alaıaqtardyń qolyna túskenin jáne shottaryndaǵy aqshany urlaýǵa áreket jasalyp jatqanyn aıtady.
Sodan keıin aqshany «qaýipsiz shotqa» aýdarýdy nemese basqa da operatsııalar jasaýdy talap etedi.
— 17 qyrkúıekte Ulytaý oblysynyń polıtsııasy Jezqazǵan turǵynynyń aqshasyn jymqyrý faktisi boıynsha sotqa deıingi tergeýdi bastady. Er adam alaıaqtardyń sózine senip, depozıtterindegi barlyq aqshany sheship alyp, olardyń nusqaýy boıynsha úshinshi tulǵalardyń shottaryna aýdarǵan. Keltirilgen zalal 9 mln teńge boldy, — dep habarlady vedomstvo.
Qazir atalǵan is boıynsha sotqa deıingi tergeý jalǵasyp jatyr.
Bas prokýratýra azamattardy qyraǵy bolýǵa úndedi. Ulttyq banktiń jáne basqa da memlekettik organdardyń qyzmetkerleri telefon arqyly azamattardan alaıaqtardan qorǵaý syltaýymen nesıe rásimdeýdi, múlikti satýdy nemese aqshany úshinshi tulǵalarǵa aýdarýdy talap etpeıdi.
Sondaı-aq bógde adamdarǵa SMS-kodtardy, parolderdi, bank kartalarynyń derekterin jáne aqshaǵa qol jetkizýge múmkindik beretin basqa da málimetterdi bermeý qajet.
Eske salaıyq, buǵan deıin «Damý» qory arqyly nesıe alyp beremin degen alaıaq 4 jylǵa sottalǵanyn habarlaǵan edik.
