Ulttyq bank jumysyna áli de suraqtar bar – Prezıdent valıýta baǵamy týraly
ASTANA. KAZINFORM – Halyqty ulttyq valıýtanyń qubylmalylyǵy alańdatyp otyr. Bul týraly Prezıdent Qasym-Jomart Toqaev Úkimettiń keńeıtilgen otyrysynda aıtty.
QR Ulttyq bankiniń tóraǵasy Tımýr Súıleımenov óz baıandamasynda aqsha-kredıt jáne fıskaldyq saıasat arasyndaǵy teńgerimsizdikti joıý baǵytynda naqty sharalar ázirlenip jatqanyn aıtty.
− Ótken jyly valıýta naryǵyna dollardyń jahandyq nyǵaıýy, geosaıası shıelenistiń saqtalýy, negizgi eksporttyq pozıtsııalarǵa baǵalardyń qubylmalylyǵy áser etti. El ishinde valıýtaǵa suranys artty. Ásirese qarajattyń shamadan tys aǵyny yqpal etti. Qazaqstan qor bırjasynda dollar boıynsha saýda-sattyq kólemi 50%-ǵa jýyq ósti. Valıýtanyń shekteýli usynysy jaǵdaıynda teńge baǵamy 15,5%-ke tómendedi, - dedi ol.
Teńge baǵamynyń shamadan tys aýytqýlaryn azaıtý úshin valıýtalyq ınterventsııalar júrgizilgen. Valıýtalyq operatsııalardyń negizdiligin baqylaý maqsatynda 12 bank pen qarjy uıymdary tekserilgen. Ekinshi deńgeıli bankterdiń valıýtalyq operatsııalar boıynsha eseptilik merzimi qysqartylǵan.
− Qabyldanǵan is-sharalar nátıjesinde valıýtaǵa shekten tys jáne ajıtoajdy suranys azaıdy. Syrtqy ortada jáne el ishinde kútpegen ózgerister bolmasa, teńge baǵamy jańa fýndamentaldy deńgeıin tapty dep esepteımiz, - dedi T. Súleımenov.
Óz kezeginde Memleket basshysy Qasym-Jomart Toqaev Ulttyq bank jumysyna qatysty áli de suraqtardyń bar ekenin aıtty.
– Eń aldymen, halyqty ulttyq valıýtanyń qubylmalylyǵy alańdatyp otyr. Sarapshylar amerıkalyq dollardyń nyǵaıýyna baılanysty teńge baǵamyna qysym bolatynyn boljap otyr. Valıýtanyń turaqtylyǵyn qamtamasyz etý jáne jalpy ınflıatsııany tejeý – óte mańyzdy jumys. Tipti bul qazir Úkimetpen tyǵyz yntymaqtastyqta júrgizilýi qajet negizgi jumys. Burynǵy «biz táýelsizbiz jáne derbespiz» degen ustanymdar qazirgi jaǵdaıda jumys istemeıdi, sebebi jaǵdaı ózgeshe, - dedi Qasym-Jomart Toqaev.
Buǵan deıin Qasym-Jomart Toqaev Úkimettiń salyq-bıýdjet júıesin reformalaý týraly usynysyn maquldap, biraq halyqqa túsindirý jumystaryn júrgizý keregin basa aıtqan edi.