Byltyr Ózbekstanda jemqor sheneýnikter memleketke $278,3 mln zalal keltirdi

TAShKENT. KAZINFORM – Byltyr Ózbekstanda qylmystyq jaýapqa tartylǵan laýazymdy tulǵardyń sany 37,2%-ǵa ósti, dep habarlaıdy Kazinform agenttiginiń menshikti tilshisi.

Bas prokýratýranyń málimetinshe, 2024 jyly ózbekstandyq sheneýlikterge qatysty 3 821 qylmystyq is qozǵalyp, tıisinshe 4 906 adam jaýapqa tartylǵan.

Sottalǵandar arasynda 71 adam respýblıkalyq (2023 jyly 49 adam), 410 sheneýlik oblystyq (267 adam), 4 425 maman (3 259 adam) aýdandyq, qalalyq deńgeıdegi memlekettik organdardyń qyzmetkerleri.

Laýazymdy tulǵalar jasaǵan qylmystardyń saldarynan memleketke 3,61 trln sým (shamamen $278,3 mln) zalal keldi. Bul rette isterdi aldyn ala tergeý barysynda 2,3 trln sým ($180,6 mln) úkimet paıdasyna óndirilgen.

Eske salaıyq, Ózbekstanda jemqorlyqqa beıim keletin sheneýnikterdi erte anyqtaý tájirıbesi engizilmek.

Sonymen qatar, byltyr kórshiles elde ekonomıkanyń damýyna selqos qaraǵan 300-ge jýyq sheneynik jumystan bosatyldy.

Munymen birge, Ózbekstanda ınvestıtsııa tartý isinde olqylyqqa jol bergen birqatar joǵary laýazymdy sheneýnik qyzmetin bosatqan bolatyn.

Sonymen qatar, 2024 jyly Ózbekstanda memlekettik qyzmette júrip, kásipkerlik sýbektilerine ıelik etken mınıstrlikterdiń 398 mamany anyqtaldy.

Qosa ketsek, bir jyl ishinde Ózbekstanda bala tárbıesine nemquraıly qaraǵan 45 myńǵa jýyq ata-ana jaýapqa tartyldy.