Ulttyq bank jeltoqsanda qaı óńirlerde ınflıatsııa jedeldegenin málim etti

ASTANA. KAZINFORM - Jeltoqsanda elde jyldyq ınflıatsııa jedeldep, 8,6% boldy (qarashada – 8,4%). Jyldyq ınflıatsııa 10 óńirde jedeldedi, 9 óńirde baıaýlap, 1 óńirde ózgerissiz qaldy, dep habarlady QR Ulttyq bankiniń baspasóz qyzmeti.

Jyldyq ınflıatsııanyń eń joǵary máni Astana qalasynda tirkeldi.

Jeltoqsanda azyq-túlik taýarlarynyń baǵasy j/j 5,5%-ǵa deıin jedeldedi (qarashada – 5,4%). Osy toptaǵy taýarlar baǵasynda maksımaldy ósim Jetisý oblysynda (7,9%), mınımaldy ósim Túrkistan oblysynda (3,0%) tirkeldi.

Azyq-túlikke jatpaıtyn taýarlar baǵasynyń ósý qarqyny j/j 8,3%-ǵa deıin údedi (qarashada – 8,0%). Eń joǵary mán Túrkistan oblysynda (13,2%), eń tómengi mán Pavlodar oblysynda (5,3%) tirkeldi.

Jeltoqsanda aqyly kórsetiletin qyzmet baǵasy j/j 13,3% bolyp burynǵy deńgeıde saqtaldy (qarashada – 13,3%). Sonymen qatar baǵa Astana qalasynda (16,9%) jalpy respýblıkalyq deńgeıden birshama joǵary, Túrkistan oblysynda (9,5%) aıtarlyqtaı tómen ósti.

Jeltoqsanda el tóńireginde aılyq ınflıatsııa 0,9%-ǵa ósti, bul – burynǵy ortasha máninen joǵary (2017-2021 jyldardaǵy jeltoqsanda – 0,7%).

Osyǵan deıin Ulttyq banktiń valıýta aıyrbastaýdyń jańa erejesin bekitetini týraly jazdyq.