Ulttyq bank jasandy ıntellekti arqyly jasalatyn alaıaqtyq shemalar týraly eskertti
ASTANA. KAZINFORM – Ulttyq bank jasandy ıntellekt (neırojeli) tehnologııalary paıdalanylatyn alaıaqtyq áreketter kóbeıgenin habarlaıdy.
— Alaıaqtar jalǵan vıdeorolıkterdi taratýdy ádetke aınaldyrǵan. Sol maqsattaryna jetý úshin Ulttyq bank basshylyǵynyń, sondaı-aq memlekettik jáne quqyq qorǵaý organy ókilderiniń resmı vıdeomálimdemelerin qoldanyp, qoldan dybystaıdy. Sol vıdeorolıkter arqyly alaıaqtardan zardap shekken azamattarǵa aqshalaryn qaıtaryp, tegin kómek kórsetiletini týraly ýáde beriledi. Sondaı jalǵan rolıkter YouTube, Instagram jáne TikTok sekildi áleýmettik jelilerde jarnama arqyly taratylyp jatyr, — delingen bank habarlamasynda.
Olardy jasaý úshin adamnyń syrt kelbetin, mımıkasyn jáne daýysyn shynaıy túrde beıneleýge múmkindik beretin «dıpfeık» tehnologııasy qoldanylady. Mundaı materıaldar jalǵan aqparat taratý, qoǵamdyq pikirdi manıpýlıatsııalaý jáne memlekettik organdarǵa qoǵam senimin álsiretý maqsatynda paıdalanylady.
— Ulttyq bank azamattarǵa vıdeomaterıaldaǵy detaldarǵa muqııat bolýǵa keńes beredi: spıkerdiń jasandy mımıkasyna jáne beıneniń burmalanýyna nazar aýdarý qajet. Aqparatty tek resmı derekkózderden teksergen, kúmándi siltemelerge ótpeı, messendjerlerdegi belgisiz akkaýnttarǵa senbegen durys, — delingen habarlamada.
Budan bólek, alaıaqtar azamattardyń jeke derekteri men aqshasyn ıemdený úshin messendjerlerde jalǵan akkaýnttar, sondaı-aq bankterdiń, memlekettik organdar men ulttyq kompanııalardyń resmı saıtyna uqsas ınternet-resýrstar jasaıdy. Senim uıalatý úshin olar ashyq derekkózderden alynǵan laýazymdy tulǵalardyń fotosýretin paıdalanady.
— Ulttyq bank qyzmetkerleri aýdıo jáne vıdeoqońyraý shalmaıtynyn, jeke tulǵalardyń shotyna qyzmet kórsetpeıtinin, túrli ınvestıtsııalyq paı qorlary men qarjy ónimderine qarjylyq salym salýdy usynbaıtynyn, aqsha quraldaryn saqtandyrýmen aınalyspaıtynyn, sondaı-aq halyqpen aqshalaı esep aıyrysý júrgizbeıtinin eske salamyz. Eger siz qandaı da bir alaıaqtyq áreketke tap bolsańyz, Qazaqstan Respýblıkasynyń quqyq qorǵaý organdaryna aryzdaný kerek, — delingen Ulttyq bank habarlamasynda.
Aıta ketelik Ulttyq bank alaıaqtar paıdalanatyn qosymshalardy ataǵan edi.