Ulttyq Bank jańa serııaly banknotalardy merzimsiz aıyrbastaıdy
ASTANA. KAZINFORM — Qazaqstan Ulttyq Banki jańa «Saq stıli» serııasynyń banknotalary birneshe jyl ishinde birtindep aınalymǵa shyǵatynyn eske salady. Alaıda, eski jáne jańa banknotalardyń aınalymda qatar júrý kezeńi belgilenedi. Bul standartty túrde – 1 jyl, biraq Ulttyq Bank bul merzimdi uzartýǵa quqyly. Bul týraly Ulttyq Banktiń baspasóz qyzmeti málim etti.
«Aınalymda parallel júretin kezeń aıaqtalǵan soń barlyq bank pen Qazposhta eski úlgidegi banknotalardy taǵy 3 jyl ishinde jańa úlgidegi banknotalarǵa aıyrbastaıtyn bolady. Al Ulttyq Banktiń fılıaldary eski úlgidegi banknotalardy merzimsiz qabyldaı beredi!» – delingen habarlamada.
Esterińizge sala keteıik, «Saq stıli» jańa serııasymen jańartylǵan nomınaly 5 000 teńgelik banknotalar aınalymǵa 2023 jyly 25 jeltoqsanda shyǵaryldy. Al 2024 jyldyń jaz mezgilinde nomınaly 10 000 teńgelik banknotalar shyǵa bastaıdy.
Nomınaly 5 000 teńgelik banknotalar 2024 jyldyń naýryz aıynda jappaı aınalymǵa túsedi, sebebi tıisti jabdyqtardy (bankomat, termınal jáne t. b.) beıimdep, eldiń barlyq óńirine jetkizý úshin belgili bir ýaqyt qajet.
Jalpy, osy serııa aıasynda 2025 jyldyń sońyna deıin jańa serııadaǵy banknotalardyń barlyq nomınaldaryn aınalymǵa kezeń-kezeńimen shyǵarý josparlanyp otyr.