Ulttyq bank jańa ǵımaratqa qashan tolyq kóshiriledi
ASTANA. KAZINFORM — Ulttyq banktiń elordadaǵy jańa ǵımaratynyń qurylysy aıaqtaldy. Bul týraly Ulttyq bank tóraǵasy Tımýr Súleımenov málim etti.
Astanada ótken baspasóz máslıhatynda tilshiler bul ǵımarattyń qurylysyna jumsalǵan qarjy somasyna qatysty suraq qoıdy.
- Ǵımarattyń qurylysy aıaqtaldy. Nysannyń tehnıkalyq ashylýy ótti. Nege tehnıkalyq? Óıtkeni qaýipsizdik, aqparattyq-kommýnıkatsııalyq máselelerimizdiń barlyq ereksheligin eskere otyryp, áli de jumys jalǵasyp jatyr. Qazan aıynyń sońyna deıin tolyq kóshemiz dep úmittenemin, - dedi T. Súleımenov.
Osy oraıda ol ǵımarattyń jobasyn álemge tanymal Zaha Hadıdtiń sáýlet bıýrosy ázirlegenin, sondaı-aq bul nysan Astanadaǵy eń ásem ǵımarattardyń biri bolatynyn aıtty.
- Degenmen qansha jumsaǵanymyzdy aıta almaımyn, sebebi bul aqparat «qupııa» sanatyna jatady. Sondyqtan ony jarııa ete almaımyn. Qarjylandyrý Ulttyq banktiń bıýdjetinen baǵyttaldy, - dedi UB basshysy.
Budan buryn habarlanǵandaı, Ulttyq bank bazalyq mólsherlemeni 18%-ǵa deıin kóterdi.
