Ulttyq bank valıýtalyq ınterventsııaǵa qatysty málimdeme jasady

ASTANA. KAZINFORM — Shilde aıynyń qorytyndysy boıynsha teńge baǵamy 1 AQSh dollary úshin 540,72 teńgege deıin, 4%-ǵa álsiredi. Qazaqstan qor bırjasyndaǵy saýda-sattyqtyń ortasha aılyq kólemi bir aıda 235 mln AQSh dollarynan 260 mln AQSh dollaryna deıin ulǵaıdy. Jalpy saýda-sattyq kólemi 5,7 mlrd AQSh dollary boldy. 

Shildede Ulttyq qordan 700 mln AQSh dollar kóleminde valıýta satyldy. Bul respýblıkalyq bıýdjetke transfertter bólýdi, sondaı-aq «Taldyqorǵan-Úsharal» magıstraldyq gaz qubyryn salý jónindegi ınfraqurylymdyq jobany qarjylandyrýdy qamtamasyz etýge múmkindik berdi. Ulttyq qordyń satý úlesi jalpy saýda kóleminiń 12%-yn, nemese kúnine shamamen 32 mıllıon AQSh dollary boldy.

— Úkimettiń respýblıkalyq bıýdjetke transfertter bólýge arnalǵan aldyn ala boljamdy ótinimderi boıynsha tamyzda Ulttyq banktiń Ulttyq qordan 400 mln AQSh dollarynan 500 mln AQSh dollaryna deıin valıýta satatyny kútiledi.

«Teńestirý» operatsııasy aıasynda shildede 290 mlrd teńge alyndy. Tamyz aıynda osy maqsatta shamamen 290 mlrd teńge balamasynda valıýta satý josparlanyp otyr.

Ulttyq qordyń qarajatymen operatsııalar júrgizý, sondaı-aq «teńestirý» tetigin iske asyrý kezinde Ulttyq bank naryqtyq beıtarap qaǵıdatyn saqtaıdy, ol shetel valıýtasyn turaqty jáne birkelki satýdy bildiredi, — delingen habarlamada.

30 shildede valıýta naryǵyndaǵy ótimdilik barynsha tómendep, alypsatarlyq qysymnyń kúsheıýine baılanysty Ulttyq bank 125,6 mıllıon AQSh dollary kóleminde valıýtalyq ınterventsııalar júrgizdi.

Interventsııalardy júrgizý alypsatarlyq belsendilikti tómendetýge jáne naryqta qajetti ótimdilikti qamtamasyz etýge múmkindik berdi.

Kvazımemlekettik sektor sýbektileriniń valıýtalyq túsimniń bir bóligin mindetti satý normasy aıasynda ótken aıdyń qorytyndysy boıynsha valıýtalyq túsimdi satý kólemi shamamen 450 mln AQSh dollary boldy.

— BJZQ zeınetaqy aktıvteriniń valıýtalyq úlesin uzaq merzimdi kezeńde keminde 40% deńgeıinde ustap turý maqsatynda Ulttyq Bank shilde aıynda bırja saýda-sattyǵynda shetel valıýtasyn satyp aldy, onyń jalpy somasy 35 mln AQSh dollaryn nemese jalpy saýda-sattyq kóleminiń shamamen 0,6%-yn qurady. Aǵymdaǵy baǵam deńgeıinde BJZQ valıýta úlesiniń 40%-dan asýyna baılanysty tamyz aıynda BJZQ zeınetaqy aktıvteri esebinen valıýta satyp alý josparlanbaıdy.

Ulttyq bank transparenttilik qaǵıdaty aıasynda valıýta naryǵyndaǵy barlyq operatsııa týraly tolyq aqparatty jarııalap otyrady. Qysqa merzimdi perspektıvada teńge baǵamynyń dınamıkasy naryqqa qatysýshylardyń kútýine, toqsan saıynǵy salyq tólemderine, álemdik naryqtardaǵy ahýalǵa jáne geosaıası ózgeristerge baılanysty bolady. Ulttyq bank teńgerimsizdiktiń jınaqtalýyna jol bermeıtin jáne altynvalıýta rezervteriniń saqtalýyn qamtamasyz etetin ıkemdi baǵam belgileý rejımin ustanady, — delingen Ulttyq bank habarlamasynda. 

Aıta ketelik 30 shildedegi saýda-sattyq barysynda teńge baǵamy AQSh dollary úshin 550 teńgege deıin jetip, aı basynan beri 5,8%-ǵa, al jyl basynan beri 4,7%-ǵa álsiregen edi.