Ulttyq bank valıýta naryǵyndaǵy jaǵdaıǵa qatysty túsinik berdi
ASTANA. KAZINFORM – QR Ulttyq banki tóraǵasynyń orynbasary Álııa Moldabekova valıýta naryǵyndaǵy jaǵdaıǵa qatysty túsinik berdi.
— 2025 jylǵy 5 qańtarda teńge baǵamy 1 AQSh dollary úshin 525 teńge deńgeıinde ashylyp, 1 AQSh dollary úshin 525-528 teńge aralyǵynda saýdalandy. Keshegi saýda-sattyq qorytyndysy boıynsha ortasha saralanǵan baǵam 1 AQSh dollary úshin 526,30 teńge deńgeıinde qalyptasyp, 0,2%-ǵa álsiredi.
Halyqaralyq qarjy naryqtary jabyq bolǵandyqtan, saýda-sattyqtaǵy belsendilik tómen bolyp, onyń kólemi nebári 119,5 mln AQSh dollaryn qurady. Salystyrý úshin aıtsaq, 2024 jylǵy qańtarda saýda-sattyqtyń ortasha kúndik kólemi 172 mln dollar bolǵan edi, al 2024 jylǵy jeltoqsanda 254 mln dollarǵa jetti. Naryq qatysýshylarynyń suranysy negizinen demalys kúnderi jınaqtalǵan dollar boıynsha qysqa pozıtsııamen qalyptasty, - deıdi ol.
Sondaı-aq Álııa Moldabekova teńge baǵamyna qandaı syrtqy faktorlar áser etip jatqanyn atap ótti.
— Kúsheıip turǵan AQSh dollary damýshy elderdegi basqa valıýtalar sekildi teńgege de qysym kórsetip keledi. AQSh dollarynyń ındeksi 108 tarmaqqa jetti – bul eki jyldaǵy maksımým. Osy jaǵdaıdyń ózi ınvestorlar tarapynan amerıkalyq valıýtaǵa qyzyǵýshylyq artqanyn kórsetedi, al ol búkil álemdegi ulttyq valıýtalardyń pozıtsııasyna teris áser etedi.
Taǵy bir faktor – Reseı rýbliniń dınamıkasy. Oǵan naryq qatysýshylary Qazaqstannyń saýda aınalymyndaǵy Reseıdiń mańyzdy róline baılanysty nazar aýdarýǵa daǵdylanǵan. Alaıda, uzaqqa sozylatyn merekelik demalys kezeńinde Reseı rýbliniń AQSh dollaryna qatysty baǵamy tómen ótimdilikpen burmalanýy múmkin ekenin eskerý qajet. Mundaı kezeńderde qubylmalylyq artýy múmkin. Máselen, 2025 jylǵy 3 qańtardaǵy jaǵdaı boıynsha baǵam 1 AQSh dollary úshin 110,6 rýblge deıin álsiredi, - deıdi Ulttyq bank tóraǵasynyń orynbasary.
Spıker teńgege qaraǵanda rýblge aıryqsha, sonyń ishinde sanktsııalyq sıpattaǵy faktorlar áser etetinin aıtady.
— Meniń oıymsha, qazirgi jaǵdaıdaǵy Reseı rýbliniń dınamıkasy baǵdar bolmaýǵa tıis jáne ol naryqtyń shamadan tys reaktsııasyna yqpal etýi múmkin. Al bul jergilikti naryqta baǵamnyń qalyptasýyn burmalap, artyq qubylmalylyqqa ákeledi. Qazirgi ýaqytta bizdiń elderimizdiń naryqtary ártúrli jaǵdaıda jumys isteıtini anyq. Sondyqtan osy jaǵdaılarda Reseı rýbliniń AQSh dollaryna qatysty kúrt aýytqýy teńge/dollar aıyrbastaý baǵamynda kórinbeýi kerek, óıtkeni ol irgeli ekonomıkalyq shyndyqqa sáıkes kelmeıdi, - dep túıdi sózin ol.
Aıta keteıik, buǵan deıin Ulttyq bank qańtarda Ulttyq qordan qansha dollar satatynyn aıtqan edi.